Ad Block Ad Block
健康
2020-06-03 04:30:00
日報

身心字典: 手指拗出唔拗入?

分享:

曾:「我係真醫生。」林:「我係臨病人。」曾:「今日我哋講下手指肌腱受傷嘅病。」
 

 林:「醫學上有冇手指拗出唔拗入嘅情況?」曾:「手指一共有3個關節,包括掌指關節、近端同遠端指間關節,而拇指就有掌指同指間兩個關節。屈指同伸指肌腱負責手指關節嘅活動,一旦受傷斷裂就可能屈伸唔到,甚至令手指變形,例如鎚狀指、鈕扣指同埋球衣指。」


林:「咁鎚狀指係拗出定拗入?」曾:「鎚狀指通常發生喺手指篤魚蛋,遠端指間關節伸直時被個波打中,結果伸指肌腱斷裂而無法伸直,形狀似鎚仔。有時嚴重到,連遠端指骨都會撕脫骨折。如果無及時處理,肌腱唔平衡就會引致近端指間關節拗出(過度伸展),變成鵝頸畸形。」


林:「咁鈕扣指又係點樣?」曾:「鈕扣指都係伸指肌腱受傷,但斷裂位置係連接中間指骨嘅中央束,除咗令近端指間關節無法伸直,仲穿過肌腱嘅破口突出,好似衫鈕穿過鈕孔咁。而肌腱唔平衡,又會導致遠端指間關節拗出,變形同鎚狀指啱啱相反。」


林:「咁球衣指同波衫又有咩關係?」曾:「打波除咗篤魚蛋受傷,有時為咗爭波,仲會用手指勾住對手件波衫。結果手指被用力扯開,導致屈指肌腱斷裂,甚至連遠端指骨都扯斷,手指唔可以屈埋拗入。斷咗嘅屈指肌腱,仲有時縮到去掌心,需要盡快做手術駁返。」

Ad Block


林:「咁手指拗出唔拗入嘅人係咪應該被DQ?」曾:「撕裂過後,雙方又唔肯去修補關係,最終社會都難免扭曲變形。但戾橫折曲嘅變形金手指,其實又邊有資格用嚟指控別人呢?」
作者為骨科專科醫生

請接受以下私隱政策及免責聲明,以示你同意am730內之私隱政策及免責聲明。了解更多
接受