骨科醫生與股評人之日常
在一個早上的診症室外，當病人正坐着輪候看醫生，診所內的電視也如常9時起直播着財經節目：「(大師)頭肩頂形態一旦出現，股價再跌穿埋頸線，就係強烈嘅賣出訊號⋯⋯」
回到診症室內，骨科醫生正在為肩頸痛病人診症：「有時候頭痛同埋肩頸痛，會一齊出現，通常都係因為工作壓力大而引發緊張型頭痛，同埋姿勢不良而引發肩頸肌肉痠痛，較小機會係由於『頸源性頭痛』。所謂頸源性頭痛，簡單講就係高位頸椎出現關節退化、椎間盤突出或肌肉發炎。因為高位頸椎嘅神經，同面部三叉神經核喺腦幹交會，頸痛訊號就有機會『搭錯線』而變成頭痛。至於低位頸椎間盤突出，如果痛楚跌穿埋『頸線』而痛到落手臂同手指，就係患上頸椎神經根病變發出嘅訊號。」
來到財經節目中段：「大師，之前你推介過嘅9413，我應唔應該依家先至嚟止蝕呢？」「如果你早啲打上嚟問我，我就會建議你清倉，一股不留，換馬去買⋯⋯」
回到診症室內，骨科醫生正在為退化性膝關節炎病人診症：「膝關節退化嘅『止蝕位』，就係喺軟骨仲未完全磨蝕、未演變成『骨磨骨』嘅中早期階段。呢個時候如果及早減肥，鍛煉大腿肌肉，都仲有機會保得住膝關節，唔使去到換骹呢一步。當個膝頭哥開始變形，例如常見嘅O形腳，全身嘅重量就會集中晒喺膝關節內側，令軟骨同埋半月板磨蝕加劇，膝頭哥就好似負面因素繼續發酵咁，加速變形同退化。去到呢個時候，你就必須考慮將膝關節裏頭嘅骨刺『沽清』，即係做換骹手術。依家人工關節嘅壽命超過20年，足以跨越幾個經濟大周期。對長者嚟講，近乎係等同終身持有人工關節，而唔使日後再『換馬』做翻修手術。」
到了財經節目尾聲：「臨走前，大師你點睇後市？」「我依然維持，恒指最樂觀見四萬點嘅睇法⋯⋯」
回到診症室內，骨科醫生正在為骨質疏鬆病人診症：「人人都想健康長壽，寧願『死晚點』都好過恒指四萬點。但係骨質疏鬆係『無聲殺手』，骨質靜悄悄咁流失；平時無病無痛，要到跌親骨折先至知出事。50歲以上嘅朋友，大概每3個女性或者5個男性，就有一個喺成世人裏頭，會因為骨質疏鬆而骨折。最嚴重的要數髖關節骨折：有近四分一患者喺骨折後嘅一年內離世，主要係因為術後併發症，例如係長期臥床引致可致命嘅肺炎。所以記得及早做骨密度檢查，加入治療骨質疏鬆嘅審慎陣營，先至可以避免將來骨折呢個『健康審判日』嘅來臨！」
股評人分析股價走勢，骨科醫生則量度股骨頸的骨質密度和治療股骨骨折。
