團綜咁real得唔得㗎？
最近COLLAR喺ViuTV嘅團綜《COLLAR以為去度假》，網上好多討論，主要圍繞覺得內容太真實，唔只喊到扭曲晒嘅素顏樣，仲毫不掩飾COLLAR成員遲到嘅懷習慣，即使最後幾集似乎話佢哋有啲改善，但都未必對沖到之前幾集種落嘅形象同批評。加上而家係只睇標題嘅世代，一個十幾集嘅節目，又點會有人細心睇佢哋嘅變化過程？
團綜要有節目效果之餘，當然想推高藝人人氣，今次喺兩者之間似乎未攞到平衡，我覺得唔係任何人嘅錯，只係時代唔同咗，基於以下兩個觀察︰
第一ViuTV 2016年開台以來，都係標榜「實況娛樂」，節目係影視圈中相對地真實嘅定位。真人騷、炸生啤、笑公司，甚至藝人節目中講粗口(後期當然消音)，係反映公司俾製作團隊創作自由同空間，同時都希望呈現藝人嘅真性情。呢種「真實」喺ViuTV開台初期，獲得嘅掌聲較大，而家明顯冇咁受落，當然可能係因為新鮮感減退，但我覺得更重要嘅，或者係因為香港人變咗，對「真實」嘅追求減退咗。
而家香港人係一個滿足於有Labubu同Jelly Cat簡簡單單、睇下短片、食吓平嘢就開心嘅年代，「真實」嘅價值或者經已太過複雜。呢個純粹係觀察，冇真實數據，亦冇價值嘅判斷，鍾意簡單唔係錯，唔使太刺激、太認真、太用腦，因為根本唔想面對思考，生活冇咁攰，輕鬆好多。
當對「真實」嘅需求少咗，就會好容易被其他元素嘅重要性蓋過，例如藝人嘅形象。其實藝人遲到就唔係咩新鮮事，幾多天王天后級人馬，都被爆過料成日遲到，有啲人仲專登遲到來顯示自己「卡士」，只係冇喺鏡頭前展現過。我唔知ViuTV製作組同藝人今次點傾，俾個咁real嘅團綜出街，但我只知道「真實」或者已唔係大家覺得咁重要嘅嘢，相對地有創作空間亦不再被視為係個優勢。
第二個觀察，COLLAR 8月演唱會，1個鐘內已經賣晒飛。愛嘅人仍然係愛，不愛繼續不愛，無問題，只怕愈嚟愈多人無感覺，只沉醉微短劇《好一個乖乖女》。