《那年盛夏》的三個意料之外
ViuTV劇集《那年盛夏，我們綻放如花》，被網民封做神劇，仲出現趕返屋企追大結局嘅情況，未至於五百年一遇，但都好難得。套劇咩咁好睇，已好多人分析過，導演才華，選角精準，美術質素等，呢啲都係努力同計算之內，但我覺得套戲之所以得到咁高嘅評價，仲有三個意外。
1）青春校園劇以往都係sell靚仔靚女，但演技往往令人尷尬。呢套劇九成都係新演員，聽講事前要上堂，片場仲有張錦程教戲，咁多年輕人認真做一件事，結果係意外地冇被前輩抽秤，觀眾亦冇投訴唔知班演員係乜水，反而讚佢哋個個交到戲，對佢哋嘅出身感好奇。喺香港，前輩同觀眾們咁包容係意外。
2）套劇去到結局周走勢凌厲，愈來愈多討論，亦有啲人好多聯想。老老實實，個故事早過2019創作，與其將細位放大扣連咩隱喻，我更相信係套劇好多元素都可以引起共鳴，互篤為自保，虛偽嘅教蓄，冷漠嘅同伴等，由校園到職場，大家都遇唔少，自然有揪心嘅感覺。正所謂作品一面世，作者已死，但我仍然覺得應該尊重返純粹創作嘅層次，因為咁係比被抽水嘅故事層次高好多。雖然呢套劇被意外地誤會都賺咗討論度。
3）未播之前已被公開批評budget低，結果呢？大家都覺得套劇係上得大場面，可以令觀眾煲少陣Netflix、Disney＋，重新愛上港劇。要有呢個效果，唔係靠budget高低，係睇投資者同創作人嘅眼界高唔高，咁呢個位個意外位響邊呢？就係陳健朗本身唔係Viu嘅員工，之前亦冇拍過電視劇，但據聞呢個合作早於佢拍《手捲煙》前已經萌芽，咁嘅相遇，仲唔意外？
有網民FF呢套劇喺大台播會變成點，正係突顯呢部作品突破以往模式，係大家嘅意料之外。創作係一個好有生命力嘅過程，因為當中包含好多未知。短短15集嘅作品，要成功當然係好多人嘅努力，但更多時候，作品需要有嘅，係意料之外。