Ad Block Ad Block
娛樂
2019-12-06 04:30:00
日報

黎耀祥的良心論

分享:

良心,近日先後有兩個人提及,一個是鄧炳強,一個是黎耀祥。 
 

1.基於這個欄存在於娛樂版,只談黎耀祥。

2.他接受了一個訪問,有拍片。我不知道整條片究竟拍下多少訪問內容,總之一開波,第一句被選取播出的就是:「所以我覺得成日批評TVB嘅人係好冇良心嘅。」

3.這無疑是一句很挑釁的Sound Bite,一句任何編輯記者(無論他本人撐不撐/睇不睇TVB)都渴望從被訪者口中聽到的挑釁性Sound Bite。

4.Sound Bite過後,是黎耀祥一連串質疑與憤慨。我統統打出來(連那些代表語氣的嘅嘅呢呢都打出來),不為呃字數,只為了不斷章取義,陷黎耀祥於不義:「你細個睇唔睇電視吖?我真係唔信你細個冇睇過電視!好嘞你大個嘞今時今日巴閉嘞,讀咗書嘞,知識分子嘞,搵到錢嘞,中產嘞,飲杯咖啡睇法國電影嘞,咁你就話嘞嘩呢啲好膠喎!點解要咁樣啫我覺得?好多人去批評TVB膠呀,關你哋咩事啫?你哋都唔睇㗎啦。咁同埋你話幾膠,我又唔覺喎;咁你係咪話舊嘅題材就唔好?唔係喎,啲老人家,新嘅題材我睇唔明喎,即係《天與地》、阿戚(戚其義)呢啲神劇,收視唔得喎,好嘞咁膠唔膠呀你話,唔膠嘞,冇人睇喎。咁點呢?你要明白電視唔係你同我嘅嘢嚟㗎嘛,電視係一個社會嘅嘢嚟,即係好多鬧TVB嘅人係佢唔睇TVB嘅,其實佢跟住鬧咋嘛,佢跟隊咋嘛,同埋好多人會覺得踩低TVB佢好似特別零舍係知識分子咁,即係覺得你哋呢啲低級製作,渣嘢,喂,但係你唔好唔記得我哋嘅成長,所有人嘅成長,都係TVB陪住佢㗎。其實我覺得而家好多觀眾依然係需要睇TVB嘅,依然係需要睇佢哋嘅娛樂,佢哋嘅劇集,即使幾差都好。點解呀?你要諗返吖嘛,唔係個個有錢出去娛樂,出去消遣,好多人,收工,就係返屋企睇電視。」

5.黎耀祥的良心論好簡單:既然TVB陪住你成長,如果你長大成人後唔睇TVB不特止仲走去跟風鬧TVB,就是冇良心。

6.當堂舒一口氣。在我的成長裡,ATV才是真正陪伴我的生母(TVB只是契媽),為顧念這番親恩,就算ATV幾咁不濟,我都照睇;到後來彌留之際,整個「歲月留聲」台出嚟,就更加成日睇,因為心知肚明:她就去了,冇乜機會再見了。在黎耀祥的良心論下,我應算是個有良心的人。

《生化壽屍》的駒哥不是主角,但若果沒有了駒哥,成齣戲減40分。

《生化壽屍》的駒哥不是主角,但若果沒有了駒哥,成齣戲減40分。

大部分人因為柴九而認同黎耀祥。

大部分人因為柴九而認同黎耀祥。

7.至於他說到有班人長大了中產了變成知識分子了,就去飲咖啡睇法國電影,而反過來話TVB劇好膠,首先,我從不認為睇法國片就必然高尚——OK,姑且當法國電影就是一種品味象徵吧,原來早在43年前,TVB曾拍過一系列單元劇《七女性》,其中一集《苗金鳳》,在譚家明和陳韻文處理下,竟然拍了一齣相當高達、描述一對擁抱高度資本主義香港夫婦荒謬生活情態的劇集,劇終,仲打四隻字出來:謹獻高達——這個高達,不是阿寶揸的RX-78(1976年《機動戰士》還未面世),而是法國新浪潮導演Jean-Luc Godard。原來,在黎耀祥12歲那年,TVB已經鼓吹在黎耀祥口中代表(懶有)品味的法國片。

8.我認同,電視是「一個社會嘅嘢嚟」,那麼,今時今日社會究竟需要一個怎麼樣的電視台?偏偏因為幾個人,令一個曾經陪伴香港成長的電視台,變成被一群為數不少香港人視為離棄了自己的大台。

9.我承認,好多人依然需要睇TVB劇集——「即使幾差都好」;如果明知差,而又Keep住係咁差,反正即使幾差都依然有多人會睇,Well,又算不算有良心?

10.熟我的人都知,我絕對是黎耀祥影迷,當大部分人因為他2009年做柴九講「人生有幾多個十年?」攞視帝才開始認同他,頂,我早在1998年《生化壽屍》睇他演駒哥講那句「『一樓』嚟㗎行樓梯……搭𨋢啦!」已認定他是真正的演員,甚至連他在港產片最最最低迷、好多人以睇港產片為恥時拍下的《殺手再培訓》都有睇。他那本《戲劇浮生:黎耀祥論演技與人生》我亦由頭到尾睇過,知道他較喜歡電視台的工作環境,而事實是,電視台讓他終於被肯定,但在我眼中,也同時奪走了那個即使做小人物大閒角都依然交足貨的黎耀祥。

黎耀祥首齣內地劇《鳳弈》。
我冇睇,不評論了。

黎耀祥首齣內地劇《鳳弈》。 我冇睇,不評論了。

《法證先鋒III》。我當然不介意黎耀祥有型,但這種所謂有型,靠副黑超和老西,不需要內心。

《法證先鋒III》。我當然不介意黎耀祥有型,但這種所謂有型,靠副黑超和老西,不需要內心。

請接受以下私隱政策及免責聲明,以示你同意am730內之私隱政策及免責聲明。了解更多
接受