一家人齊齊整整咪好囉，編劇Mark Gatiss(亦即係劇中的Mycroft) 夾硬嚟，你都無佢符。
演連環殺手的Toby Jones，今次我覺得演技太外露，唔夠心寒。
睇劇照總令人有無限期待，可惜睇完今季我想抹咗佢，當無睇過。
今季新加入的Sian Brooke，極多變裝化身，演技大爆發，不講劇本犯駁，她的演出最叫人印象深刻。
It is what it is。距離上季足足三年，《Sherlock》第四季全三集話咁快追完，睇完只能夠講WTF，人物性格發展完全跟唔到劇情的twist & turn，為扭橋而扭橋，扭完一大懶餐都唔知為乜，超級火滾。
情感貧脊
一季三集其實好短，問題係編劇講足三個古仔仲要互有關聯，觀眾跟劇情已忙到不可開交，於花多眼亂的視覺效果跟數不完的扭橋中間，主角心理變化的交代就變得嚴重不足。第一集就經已投擲一個超級大的情感核彈，我不劇透了，總之就是Sherlock跟Watson友情大考驗，但到了第三集大結局，回頭看這個所謂的考驗，已是雲淡風輕了無痕跡，我一點都感受不到兩位主角、尤其是Watson有幾traumatized，搞到Watson雞毛鴨血，其實係無必要寫到咁死，原來最終都係為了二人重回Bromance正軌，這樣為推進情節而服務，看二人演出當然係賞心樂事，但多好的演員也救不了情感貧瘠的劇本。
審美疲勞
第二集主要破一宗連環殺手案，找來實力派Toby Jones演這位連環殺手，這集用上的視覺效果更多更密集，直頭令我有審美疲勞，這集也有個位令人很困擾，Toby問Sherlock如何破連環殺手案，Sherlock答就跟破其他殺人案一樣沒分別，以前Sherlock就正正說過，連環殺手之所以難捉，就是因為行兇動機完全是隨機的，無跡可尋，亦因為如此serial killer才叫人既懼且怕。怎麼事隔三年，Sherlock的破案心思就粗疏了這麼多，簡直變了樣。
做戲咁做
第二集尾再來投擲一枚深水炸彈，亦是全劇最叫我WTF的moment，季尾集的The Final Problem，Mycroft及Sherlock原來不只兩兄弟，還有一位家庭成員，亦是Sherlock只有理性沒有感情的因由，平白無端毫無伏線，還將Sherlock宿敵Moriarty的幽魂硬生生塞進呢個narrative中，看得人好不耐煩，也不見得有說服力，尤其一連串要Sherlock揀Mycroft定Watson的心理遊戲，twist得來卻不能令觀眾真正為主角擔心，there’s nothing at stake here，做戲咁做，Sherlock最終的人格完成，亦顯得蒼白無力，完全唔深刻。
Default重來
據聞所謂全劇終也不用太上心，可能再等三年，又來一次default，Sherlock跟Watson又無事無幹地破案去，理得觀眾一路媽叉一路咪又痴痴地等，有Benedict Cumberbatch同Martin Freeman，觀眾狠得下心唔睇咩？！