由許晉邦創作、盧智燊執導的中英劇團舞台劇《代父重婚》，6月底在葵青劇院黑盒劇場順利首演五場，我相當喜歡，很想大大力「推到重演」。那天(6月21日)下午散場後，已馬上在IG限時動態寫了幾句觀後感，後來覺得還是有很多問題想知，便轉移陣地在WhatsApp向許晉邦一問一答，又覺得不夠暢快。索性在本周專欄截稿前一天(7月9日)相約在中環見面，了解劇本怎樣誕生。
首先簡單介紹許晉邦(Jim)。假若有追看ViuTV的原創劇集，應該對這個人的外表有點印象，他在《十七年命運週期》(2024)飾演回力劇社成員Goodman；今年年初播出的《弊傢伙！我要去祓魔》，他飾演陷害端木弧(強尼)，導致冥界之門打開的梁樂寬，引起網民留意。
2013年在香港演藝學院畢業後，阿Jim曾參與多套劇場演出，並演而優則編，今年憑香港話劇團作品《半桶水》榮獲「第33屆香港舞台劇獎」最佳劇本，實力不容忽視。《代父重婚》是他第一次跟中英劇團合作，簡單而言就是一個關於「X你老母」的故事：與阿媽關係惡劣的「衰仔」成桂賢(阮瀚祥)，因為一時口快，向「神奇仙人掌」──是母親(文愷霖)當年送給父親的定情信物，後來由姑姐成珍(蔡蕙琪)負責照料──許願時一語成讖/夢想成真，越穿時空返回父親迎娶母親那天，成桂賢變成老竇，一步步走向「自己X自己老母」的矛盾大對決，引爆連番笑話。
阿Jim記得，《代父重婚》由構思到修改到定稿歷時8個月，算是他從入讀演藝之後去到2024年8月獲中英劇團助理藝術總監盧智燊(Edmond)邀約創作這段時間的人生經驗總和。那時正值入學的第一年，阿Jim剛剛接觸戲劇，而且大多圍繞悲劇為主的經典劇目，「嗰陣時陳淑儀老師同埋伍潔茵老師教我哋acting啦，成日都叫我哋摷啲記憶出嚟，去演某一啲戲，我就好suffer。因為其他同學分享佢哋嘅屋企背景，有啲家破人亡，有啲就妻離子散，我完全係健康家庭，好幸福，你要我去撩一啲(記憶)去做希臘悲劇我做唔到喎。咁老師就話，一班人一齊成長，一齊讀acting，唔係個個都沉淪(悲慘的經歷)落去嘅，總要有一啲人係做旁觀者，而呢一啲人有個優勢就係，可以好冷靜咁觀察，(面對)好情感澎湃嘅同學可以疏導佢哋嘅情緒，同時可以copy佢哋，攞嚟自己用。自此之後，我就用呢個方法去演戲，或者吸收一啲新嘅情感或者故仔(靈感)……我好想寫一個關於家庭嘅戲。」
「最初個故仔點樣彈出嚟？就未有粗口嘅，純粹係(基於)一個(想法)：我想了解屋企有咩方法？除咗《飯戲攻心》咁樣問阿媽：『喂，你以前係點㗎？阿爸以前係點㗎？』之外，最好就係咩？穿越囉！就一定可以解決到，你見證到屋企人究竟以前係點。最初諗真係想返去(舊時)同阿媽相處嘅，但諗諗下其實冇咩好寫，咪會變咗《回到未來》真係(阿仔)溝阿媽囉，唔係我想要嘅嘢，慢慢就彈咗一個concept就係《伊底帕斯王》。」這是希臘悲劇代表作，講述伊底帕斯「弒父娶母」的故事。
另邊廂，疫情期間阿Jim在Netflix看到一齣2022年的法國劇集《莉亞的7重人生》(The 7 Lives Of Lea)，女主角Léa發現一副遺骨後，竟然成功穿越到九十年代，並經歷7次身體交換，只為查出男主角Ismaël的死因。「最後一次(穿越)嗰晚，如果Léa要救到Ismaël呢，佢就要自己死，我就好鍾意呢條橋，好想擺落呢個劇本度，就慢慢砌咗呢個form出嚟：就係要犧牲自己先可以成全到呢個家庭。」
至於現時劇中的成桂賢，其性格設定亦跟創作初期的構思不同。「最初成桂賢唔係強姦咗人嘅(故事起點)，唔係有咩唔滿意就『hur晒出嚟』，係掉返轉，好潦倒、好怕事、好鵪鶉，係宅男，一路匿埋唔肯做嘢，唔滿意屋企點解會搞到佢而家咁樣；但Edmond睇完個synopsis之後就話：會唔會掉返轉好寫啲呢？即係一個忤逆仔改變？唔係一個宅男去衝破自己？好似又得喎，就開始搵reference，就俾我喺街度遇到有個MK仔喇……」篇幅所限，故事未完，下回繼續。