鄭秀文(Sammi)首個啟德演唱會，臨開場前4日，突然宣布因為舞台部件故障而要延期，改為以「答謝會」取代。而答謝會不但有巨星嘉賓撐場，Sammi更唱足十幾首歌，亦有齊舞台效果，成功挽回樂迷嘅心。危機解除，但以下3個疑問依然耐人尋味：
第一：到底咩事要緊急叫停？
網上眾說紛紜，真正答案可能永遠都係個謎。但令人好奇嘅係：如果硬件問題嚴重到可以令一個涉及龐大資金同觀眾嘅演唱會被迫叫停，而主辦方竟然又可以喺短時間內，搞到一個高水平製作嘅答謝會？呢個反差令後面兩個問題顯得更耐人尋味。
第二：監管程序上，仲有冇進步空間？
好多網民都將今次事件同幾年前嘅MIRROR演唱會相提並論，普遍認為今次處理得相當好。我覺得，「果斷叫停」必然同幾年前紅館事件有直接關係。嗰次不幸事件後，全行由監管機構、工程師、主辦方到藝人本身意識都大大提高。
過去幾十年大家一直沿用、以為無事嘅「行規」。因為一次不幸事件，整體標準終於提高，大家更加小心翼翼。所以，今次處理手法明顯係全行業意識提升嘅勝利。但問題係：點解要到開場前4日先發現問題？我哋能唔能喺更早階段就減低呢類問題出現嘅可能？咁就延伸到第3個問題。
第三：到底係制度定係「人」嘅問題？
有網民發現，Sammi演唱會嘅監製同幕後班底，同當年MIRROR演唱會事件嘅高度重疊。結合上述幾個問題一齊睇：行業進步咗、大家小心咗，但如果背後仲係同一班人，而同樣又喺最後關頭出問題，咁除咗制度要完善之外，「人」會唔會都係最大嘅關鍵？
司機都有扣分制度；而監製喺演唱會運作流程中，比起歌手、舞蹈員、幕後俾錢嘅主辦方、甚至批核文件嘅單位，更有控制細節嘅能力同責任。既然如此，我哋對「監製」呢個職位嘅專業要求同問責制度，係咪都有更大嘅進步空間呢？