Ray上個禮拜介紹限量版「麥當勞X 出前一丁」主題陶瓷碗碟套裝，好多朋友都話明日(2月27日星期三)必定去換購，但就心諗麥記同清仔除咗聯手出陶瓷碗碟外，遲下仲有無食得落口嘅下文呢。咁當然有啦，就係明日起兩強首度推出出前一丁招牌口味Shake Shake薯條調味粉，前後會推出兩款，包括出前一丁黑蒜油豬骨湯味及出前一丁麻油味，真係諗起都想食。
今次合作係配合麥當勞期間限定「Taste of Japan」系列，明日起頭炮先推出「宮崎風味南蠻炸雞漢堡」和「名古屋風味味噌吉列豬扒漢堡」兩款全新口味漢堡，而伴隨兩款漢堡登場的，就係「出前一丁黑蒜油豬骨湯味調味粉」，Ray腦海中立時浮現香脆金黃薯條沾滿濃濃黑蒜油豬骨湯香嘅影像，點忍得口，再加上全新「白提子椰果梳打」，啖啖清新的白提子梳打內有粒粒椰果，絕配！
第二炮就要等到3月21日「Taste of Japan」最後一站，「金澤風味黑咖哩吉列豬扒漢堡」配以「出前一丁麻油味調味粉」，Shake Shake薯條竟會出經典出前一丁麻油味，好想試囉！