近期都有唔少與傳媒相關的消息，繼阿里巴巴收購《南華早報》之後，Ray亦留意到正密鑼緊鼓籌辦新媒體《香港01》的于品海，又有新搞作。其控股的南海控股有限公司(680)日前公布，連同一家獨立第三方投資公司一起，以代價約1.75億美元(約13.56億港元)收購擁有Crabtree & Evelyn全球業務的CE Holdings Limited全部股份，以助力旗下的大地影院開啟「電影+」戰略。 見到呢單交易，Ray覺得好有趣，電影院點樣同護膚品扯上關係？睇番南海控股嘅公告，當中提到佢哋睇準未來十年，將是中國大眾消費市場升級的巨變時期，即係由滿足衣食住行基本需要，逐步過渡到追求高品質產品與服務嘅「品質生活」消費階段，而呢種消費需求將呈高速增長趨勢，進而有巨大的市場潛力。即係話呢片係新興藍海市場，該股於是制定長期發展戰略，以旗下大地影院為核心，提出「電影+」的概念，加強跨界合作，其中收購Crabtree & Evelyn就係「電影+創意零售」的戰略之一。 公告仲話，雖然Crabtree & Evelyn仲未正式進入內地市場，但品牌早已被內地消費者認知，並擁有一定數量的忠實追隨者，同時憑大地影院在內地市場豐富的連鎖運營等經驗，將有助品牌快速進入內地。唔怪得旅發局主席林建岳話中國市場係「肥肉」，Ray真係要多加留意。
Ray~投身傳媒工作多年，由市場研究做起，一直與公關、廣告、新聞界結下不解緣，心境永遠青春。