六呎四為了趕回家，在排骨仔和叉燒妹睡前見一面，決定在大學站的士站轉的士：「司機，唔該XX花園。」
司機；「咩話？」車廂空氣凝住了。
六呎四奇怪，難道自己講唔清楚，於是重複：「XX花園，YY花園隔離。」
司機；「你過隔籬搭綠的啦！」
六呎四開始明咩事，但詐傻；「綠的去唔到㗎喎。」
司機一計不成，再生一計，以訓示語氣：「呢度過海㗎，你去截過第二架啦。」
六呎四也不是省油的燈：「喂，阿哥，呢度從來都唔係過海的士站……」
「我排咗成個鐘喇，你截過第二部啦！」司機明顯久經戰陣，立即插話，訴諸同情。
六呎四：「阿哥，呢度係的士站，附近是不能上車，你部車單線的士站排頭位，我點搭第二部車呀？」
車廂片刻死寂，山雨欲來！
「XXXX！遇著瘟神，都唔X識做人，死都唔落車！XX！」司機一邊怒吼，一邊開車！
過往六呎四遇過不少司機拒載，通常都是不願過海，一係自稱唔識路，一係要交更，再唔係人有三急，通常都無謂糾纏，但今次拒載情節「特別嚴重」，仲惡人先告狀，六呎四決定嚴詞反擊：「你揸的士嘅，梗係有長有短㗎啦！我枝旗都50蚊，唔係好差啦，想淨係做長途，你不如冚旗等長途order囉！咩話，排咗一粒鐘？唔想等，你咪四圍兜客囉，守株待兔，仲嫌隻兔唔夠肥，好心你啦，有生意做，仲要用粗口鬧個客，的士界就係俾你呢啲害群之馬累死！你嫌路程短嘛？去馬鞍山警署定田心警署遠啲呀？你揀！」
司機：「怕咗你喇，XX，唔X講喇！」
六呎四隨即扣緊安全帶，迎接驚險刺激的旅程，只願平安歸家。