美帝政客度過一個不平安的聖誕節，因為侵侵總統決定同新國會玩鋪勁。支持自由民主的朋友，往往將十一月的美帝國會中期選舉，演繹為美帝民主黨的勝利，至於支持侵侵嗰啲，就會認為係侵侵之勝利，因為參議院共和黨係佔優。問題就係咁：一個民主黨的眾議院，上面係一個共和黨的參議院，同一個共和黨內都唔係主流之侵侵做總統，大家就響預算案問題角力了。
有分析講，侵侵查實都有方法，冒著畀人鬧係違法之風險，簽行政命令去畀錢起圍牆。但侵侵冇咁做，證明佢係想搞一次政策大辯論，希望社會達至一次共識云云。如果侵侵簽行政命令就有錢起圍牆，查實又唔使同國會整場大龍鳳。問題似乎係，侵侵係想利用今次政府關門(仲要響聖誕節)，迫民主黨就範。即係所謂「行政欺凌」(bullying)。侵侵之外交霸凌就見得多，內部事務好多時已經用行政命令去繞過國會做事，今次又用霸王硬上弓方式打擊民主黨，似乎政府關門有排搞矣。
早幾日Korean fish 韓國瑜話開放畀北方強國資金買樓，聽完咪算囉。政客言行如食生菜，正常少少都知，開放北方大國去高雄買樓，都要法規同行政上配合，一個地方政府可做嘅都唔多，亦需要English Choi政府點頭，你估English Choi傻嘅咩？當然，讀者都唔會理太多，往往都係議題行先，大家嘈完一排又當冇事。至於有人話Korean fish的文宣真係好核突，咁又唔可以咁樣講。有一種文宣唔係講究美學，係講求草根性，真係草根嗰啲，就好似響北方大國嘅店舖招牌，都係嗰幾種簡體字及字型，咁響藝術家眼中，可能係好核突，但就同當地民情好配合。民情如此，你又可以點樣？
回到九合一大勝之後，又係藍綠兩營內部互殺互片之時。藍營依家最重要係邊個去選總統。侯友宜成功當選之後，佢上手朱立倫率先起跑，依家話去基層走透透去搞學習之旅，睇下民情。咁仲有吳敦義，佢依家係國民黨主席，睇個勢冇理由任由朱立倫去搞，自然會盡快加馬啟動。咁呢啲都係內部競爭，但藍營勢強，邊個贏得黨內選舉就好大機會做總統，未來朱吳互劈，好睇了。
但係，究竟綠營會點，都仲係重點，因為佢哋始終仲係執政。綠營KOL都好踴躍發言，講緊點樣去救綠營的政治生命，佢哋之建言，幾過癮，由提出不如盡地一煲，一次過響國會將嗰啲最進步的政策倡議同立法，全部過晒立法院以保住綠營得票，到全面提出台灣獨立都有。有KOL就話，綠營內部山頭林立，長期內耗導致政策不彰云云。但係，邊有現代政黨唔係山頭主義呢？老細做得唔好冇得賴。依家綠營KOL十個人三十種南轅北轍嘅政策建言，真係拗到選舉都未拗完。得啖笑矣。
倫敦大學亞非研究學院法律系博士