朋友常混淆西環、西營盤，其實西營盤是西環的一部分，如銅鑼灣是下環的一區，而今次的食店正在西營盤中間位置，正街的聯華茶餐廳。
茶餐廳設有二樓雅座，是祥利冰室外，我找到第二間在港島區有雅座的餐廳，格仔地板，木卡位，加上一把吊扇，讓我尋回祥利的感覺，而開了近四十年的聯華，始終最難忘那碟焗豬扒飯。這碟飯的分量可供兩人食，想食的話便要早叫，因為是即叫即炒即炸即焗。即叫是落單後最少等要二十分鐘，即炒的蛋炒飯飯底，炒得算做粒粒分明，蛋碎亦很多，豬扒是新鮮吉列豬扒，但上枱時，看見不是整塊豬扒，確有些失望，但每件豬扒有食指的厚度，一咬，表層又腍又脆，啖啖厚切，肉質有些硬，一碟六至七件，連肥仔如我也吃不消。
吉列豬扒連飯加番茄汁即焗，撈起時茄香四溢，味雖稍鹹，但勝在簡單，坊間有加菠蘿、紅椒、紅蘿蔔作配菜，老店只有洋蔥，食焗豬扒飯的主角是豬扒，為何要那麼多配菜呢？此外茄汁的顏色是茄紅色，不是嚇人的血紅色，食起來不是食色素；另一特色是把飯倒在膠碟上，讓飯的熱度稍降，客人可大快朵頤。朋友若不吃豬扒，另有牛扒、牛腩等少見款式。食豬扒飯時，我愛配西湯，但小店有其他店不做的凍奶水。奶水多是熱飲，這才可帶出奶香，而聯華的凍奶水，奶香及甜度俱備，即使加了冰水亦可飲到奶水的甜滑，證明煉奶落得足料，另有唂咕及飲冰可供選擇。
價錢上可能比快餐店稍貴，但新鮮即食，多付少許也覺超值，總好過付了錢而弄得一肚氣，這有兩層的茶餐廳，趁港鐵未到前來看看吧，試過便知舊風光不一定比不上新的。
地址：西環正街28號地下
電話：2540 1563
四處搵食，尤喜懷舊食物，愛好下廚，搵人做白老鼠。