細路總想做大人嘢，睇鹹片、未成年性行為、揸大膽車等等，以示自己早已成熟。我當然沒這般膚淺，因為我早已看透成年人的世界不外乎就是金錢的角力，所以我用以扮大人的方法是：食飯埋單、俾貼士──俾好多貼士。應該是十五、六歲的時候，打暑假工賺了第一桶港幣，便很豪氣地請舍弟和隔籬屋細路落去食開心時刻，埋單90蚊，我俾了$110。那個比我大幾歲的侍應說：「先生，90蚊咋喎！」
「得喇，唔使找。」
食90蚊嘢俾廿蚊貼士，換著是大人一定不幹。但，「得喇唔使找」是一句多麼有力量的對白？其他細路還在「二姑二姑淑哥兒」時我已經「唔使找」，這叫做贏在起跑線。
隨著人愈大，俾的貼士卻愈來愈少，原因不外乎「喂你已經收咗加一服務費，仲想收貼士？」更離譜的是大時大節還要加三加四，而侍應的臉一定比平日黑上三四倍，顧客俾得不開心侍應做得不高興，何苦呢？
而美國的貼士文化，在《落水狗》裡已說得清清楚楚：侍應薪金勁低，需要客人補貼。為甚麼樓面的薪金會勁低？因為如果給他們正常薪金，再加上貼士的話，便會引起廚房等等沒有貼士的「幕後員工」不滿──聽起上來實在很不對勁。
所以最近在紐約、LA等大城市興起了no tipping運動，一些餐廳明確要求客人別俾貼士，因為在裡頭工作的侍應已經有一份足夠保障生活而且有尊嚴的薪水，已保證他們能提供優良服務。如此運動普及化，「唔使找」將會成為絕唱，美國的細路，返屋企睇鹹片吧！
微博
t.sina.com.cn/nosechoy
並請在FB搜尋「阿鼻的飲食字典」並於10秒內按Like