農曆新年快到，已婚人士準備派利是，Ray今年就想試下收電子利是，除了大家都聽過同試過嘅WeChat Pay HK「紅包」之外，今年仲可以試埋土炮嘅八達通O! ePay「e利是」功能。
先介紹下八達通個新功能，由即日起至下月23日期間就可以用，用戶只要喺App設定，可以輕鬆逐個派，或「刺激成疊派」(自定不同金額和數量俾親友即時掃描QR Code隨機抽)，每次最多可派500封「e利是」㗎。此外，App內仲設有24款心意滿瀉的新年貼紙，俾大家派利是同時送上祝福㖭。仲有喎，用嚟行善都得，就係將e利是捐俾WWF。
至於WeChat Pay HK的「紅包」功能亦差不多，逐封派或大家齊齊玩「搶利是」都得，仲唔單止，WeChat Pay HK自己都大派利是，用戶只要用WeChat App掃描WeChat Pay HK或合作商戶發布的推廣活動QR code，即有機會獲得8.8港元(下同)WeChat Pay利是，或到指定商戶以WeChat Pay購物滿68元，就有機會獲贈28元利是，又或者用Mastercard或Visa首次綁定WeChat Pay HK錢包，亦有機會獲贈10元。