座式公廁，設計總是男上女下，共二十級樓梯，簡直係急到暈。
舊有的槽式廁格內藏斜式「屎坑」，貫穿一整排板隔空間，由左面水箱位將首格的便便直線向右飄流。
雖為男廁，但清潔阿姐總在身邊。
缺德人士於廁格透過塗改液和Marker，抒發政治己見或留下成人指南及聯絡電話。
香港雖是一個先進城市，但如果街頭突急便便，真係唔係地膽都唔知廁所喺邊。港人生活要求高，食、玩、瞓、屙，頭三樣皆不斷在進步，唯獨是一去不返的排泄渠道，除了自動灑水龍頭和抹手紙之增設服務，幾十年來，匆匆來，沖沖去，毫不享受。
生活就是一份關係的互動，當中人與事物與環境，總不能長期住「堅離地」城。呢度出身，呢度長大，讀書工作，拍拖結婚，都在香港。不過樓價咁高，又冇病房，生仔都係要諗過。尤其面對不斷飄移的所謂起跑線，真係唔知要贏幾多次，先至可以到達終點。亦可能淨係因為寸金尺土，所以鬧市中的公共廁所，尤其油尖旺，真係唔多個。
真公廁，多功能設施 公廁鬧市唔多，反而舊式公共屋邨就設計周到。外婆家住牛頭角下邨，這16層的舊式公屋大廈，店舖和食肆多數設於地下，不像現在般下下行去商場。而地下口旁邊通道設有男女公廁，這傳奇的槽式廁格，內藏神秘的斜式「屎坑」，貫穿一整排板隔空間。由左面水箱位將首格的便便直線向右飄流，自然經過右面幾位之兩腳中間，簡直將身體健康狀況公開互相監察。 講到監察，廁格總是被人留言於門板，透過塗改液和marker，抒發己見或留下別人的聯絡電話，關心社會政治和分享成人指南。公廁見盡港人文化，雖然提起公廁，多數只會聯想到屎尿。但每次總是遇到低級煙民在隔籬左右「煲煙」，甚至某些出名的「旅遊景點」，更會一格兩猛男在「消磨」時間，萬一急起上嚟去錯地方，或咁啱遇到「老同(癮君子)上電」，真係要急急衝刺。
廁所男，大小關關難 男廁另一個特色，就是廁板滿是尿漬。不論座廁或踎廁，都一定係得一個姿勢。仲要計算準確側旁滑落，免被大石壓水而尿花彈上褲浪。其實廁所很多設施都形同虛設，例如多數廁紙架冇廁紙、乾手機要維修或無電掣撳極唔出的洗手梘液、總係要下一手幫上一手沖廁。或遇上整座公廁需進行維修，緊急的時候都要行遠少少。 行遠啲都是偶然，但作為男士每一次都要行樓梯。新型的公廁，設計總是男上女下，二、三十級樓梯仲要轉幾個圈，每轉一下都仲會見到一個黃牌提醒「小心地滑」。而廁所的管理，亦有其荒謬的安排，十次有三次，總會遇到清潔阿姐自由出入，小便時背脊遇著陌生女士，你唔介意但我很在意。
要贏人，先要贏自己 在意的還不只你離身的女士，如廁時多會遇到白衫的酒樓廚房員工在「煲煙」。又或者他們小完個便，多數唔洗手便返去處理食物。曾到一間高級食肆，就連經理自己也是如此。反而日本人非常之重視他們的職位，其制服普遍超級整齊，連平民的快餐店店員接觸過錢幣之後，都會即時用消毒酒精搓手才去取食物給客人，專業做到敬業樂群。 重視工作，尊重別人，建立優質文化，因為香港是我家。熱愛自己地方，又點會於巴士飛機火車上作大小解。同樣Toilet就係廁所，不是專作洗手的衛生間，更不是甚麼Rest Room或Powder Room。不用強行扮高檔文明，簡單的乾淨衛生已經盡見廁所的典雅。尊重公眾使用的隱秘設施，唔係你有錢鍾意點就點，殘廁唔係Gathering的地方，同樣機場行李請自己攞。