世代之戰

睇開本欄都知，我一直睇English Choi會贏總統選舉，依家真係贏到開巷，咁希望大家明白，響好多人心目中，自由民主比食飯真係好重要。至於民主自由係未會導致冇飯開呢？呢樣嘢從來唔係對立，只係響某個國家，將自由民主同埋食飯權利對立而已。例如響某些國家例如北韓、古巴，講自由民主係會冇飯開。

English Choi大勝，令佢信心大增，未來四年唔怕同北大人開火。5月20日就任總統之前，國民黨就要大換班。查實國民黨之敗，好多原因，但一個主要嘅係敗在得唔到青年支持。唔好忘記，依家華人社會之中，享有政經實力嘅，係外國人所講嘅boomers，即係二次大戰後的baby boomers。如果閣下係上世紀五十年代出世的，依家六十幾啦。六十幾歲，響香港就係司長局長同輩啦。

Boomers係一個眨義詞，係指嗰堆權貴老餅。佢地享受晒由二次大戰以來所有的經濟好處，做埋權貴之後，千方百計用盡方法，用體制嘅優勢，迫走同佢競爭嘅下一代，又或者下下一代，唔俾社會流動。另外，又用人脈優勢，俾自己仔女上位，唔俾其他人同佢地爭。最勁嘅就係，呢班boomers，一樣用體制內嘅優勢，響退休之前後，改革埋退休福利及醫療制度，確保政府會一直幫佢地直到升天嗰一刻。於是，由出世到上天堂，加埋下一代延續體制內的優勢，呢啲就係權貴boomers。咁佢地響台灣嘅論述就係，青年唔好搞亂檔，破壞社會和諧，齊齊搵錢穩定局面。呢啲說法，係好得到唔少跟從權貴boomers搵食嘅人支持㗎。

Korean Fish就係賣呢種「發大財」嘅論述。所以佢嘅支持者就好多係中坑級嘅體制得益者。例如退役軍人、公務員同埋老師啦，之前佢地響退休前後真係鐵中之鐵嘅鐵飯碗，English Choi嘅改革係cut咗佢地福利，佢地梗係鬧English Choi啦。不過，權貴boomers響人數上，都係上一代或上上一代，年紀偏大，始終唔係主流。咁響世代之戰下，後生始終都係覺得自由民主價值，緊要過大魚大肉。無計啦，絕大部分青年都出來投票支持English Choi，綠營就贏到開巷啦。

世代之戰，唔單只係台灣出現，最早係響美帝。世代唔代表青年唔支持老餅，而係青年唔支持嗰堆支持權貴boomers嘅老餅。即使係老餅，只要佢係反對權貴boomers，青年一樣buy。所以呢，侵侵基本上冇得輸。前幾日美帝民主黨最後一場總統初選電視辯論會，我嘅左膠偶像一姐沃倫，同埋左膠二號偶像桑德斯居然互劈。唉！美帝民主黨進步力量已經唔係主流，家陣仲分裂，咁搞法，拜登似乎出硬線。美帝民主黨出拜登去撼侵侵，真係冇眼睇矣！係呀，輸硬俾侵侵啦。

世界潮流係青年湧上來。英國工黨要翻身，睇下彬叔下台之後，睇來係後生嘅中間派有機會贏了。

倫敦大學亞非研究學院法律系博士