香江的政治領袖，特別係泛民陣營的朋友，唔係壞人嚟嘅。十九幾年前，當時港英政府仲係揸莊之時，民意同官意都相當尊重人民選出嚟嘅議員。呢十年八載，上面全力封殺泛民，好多有志上位之青年，都唔會揀泛民。可以咁講，青年人願意加入泛民陣營(而唔係自決嗰啲)，人數唔係多，而且會面對更艱巨同惡劣嘅政治環境。
咁樣大家計下數。舊年有報道指，單係同雨傘活動有關嘅拘捕行動，差人就拉咗一千零三人。咁大家係未仲有印象，響金鐘咪坐咗好多泛民之政治人物，大家排排坐，等警察叔叔搭上車。好型呀嘛，但係，政府告人一樣唱慢板。有建制派媒體嘈，唱慢板冇鬼用云云。點會冇鬼用？依家咁樣做，後遺症出晒嚟。
我有提過，拉咗呢班大哥大姐，如果係即捕即告即坐監之後，理論上依家都可能放咗出嚟，然後又響社會運動方面見番佢地。但係，依家唱慢板之後，就會出現未來幾年，陸續畀人告去坐監，死火嘞，兩三年後，又有選舉殺埋身，咁樣先至真係人才斷層，因為個個都坐監，邊度仲有人去選舉？
你又可以包拗頸話，唔係嘅，逢係選舉，一樣有人去選嘅，到時好多都係支持泛民之素人啦。咁樣講，即係政黨人才收晒監，成就咗一班唔係政黨培養嘅嫡系去收割，唔係好通啦。政治素人一旦當選，唔通會還番畀你咩？
咁嘅考量之下，泛民老前輩有「大和解」想法，唔係錯誤，而係戰略上需要思考的方向。第一，呢啲前輩，唔需要響度被拘捕搏出名上位，唔係為名，又唔係為利，坐響金鐘畀人拉，就預咗坐監；第二，佢地好多都退隱江湖做吓政黨之培訓及聯絡工作，已經唔響度揸莊，決策已經唔係佢地話事。咁樣，老前輩就響大局上看，如果個個泛民老中青都收晒監，邊個響度揸旗呢？佢地響思考大和解，係從良好嘅角度去搞。既然香港社會撕裂，既然北大人話想修補撕裂，點解上面唔可以考慮「特赦」呢？
佢地呢套「大和解」想法，第一次嘅投射，係響薯片選舉嗰陣。佢地覺得，薯片係代表緊北大人內部「開明」或「和解」路線嘅人，如果佢贏咗，而泛民又支持佢，咁樣北大人同泛民就和解有望啦？老前輩呢個主觀願望，最後都落空。依家佢地透過白鴿主席之說話，希望大和解同埋「特赦」雨傘被捕人士，應該係呢套思路之延續。
呢個判斷嘅一大假設，係北大人仲有「開明」路線嘅，佢地係願意幫手緩和氣氛，而白鴿主席係幫口促進呢個良性互動而已。Well，北大人係未有「開明」路線嘅，我唔識答。但呢三十年，北大人一直用打壓方式對付泛民支持者，我就見識過。和解？泛民前輩想，人地想嗎？