Ad Block Ad Block
新聞
2019-09-13 05:15:00

完全攬炒

分享:

英帝首相波叔終於亮出終極一劍,一定要斬斷歐洲,仲要發茅迫國會提早大選。當呢招終極一劍輸埋,國會休息,全部攬炒。佢成個星期,坐響國會,同所有議員格劍,所提之議案,輸晒。


於是大家不禁會問:波叔究竟係唔係一個適合從政嘅人呢?有人分析,波叔從政,相當狡猾,佢一心只係想做首相,而為咗爬上去,乜嘢都會做,咁包括講大話、篤灰、離間及發惡等,乜嘢壞手段都做齊,咁其實係犯下政治嘅大忌。


既然係咁,又點解保守黨會俾呢個人爬上去呢?正所謂奸有奸輸。因為仲有一班覺得自己比波叔更奸嘅政客,覺得如果波叔可以做到首相,咁就可以借波叔攞番極右嘅鐵票,咁佢地至多除咗脫歐事務上緊跟波叔之外,響其他方面保持距離就可以啦。點知當波叔真係上台之後,原形畢露,同埋完全失控,一於唔理其他議員之勸進,樣樣去盡,結果黨內好多人驚呼:嘩!依家真係揀咗個狂人又失控嘅首相,點解救呢?


所以咪有人跳船唔做內閣成員,連佢細佬都辭埋國會議員唔撈,又有溫和派人士醞釀散水云云。好快保守黨又有年會,全世界都響度等波叔,點樣搞返好個黨。保守黨放咗隻怪獸做首相,結果都要想方法去解決呢個人。呢個人,最近嘅講法,係用電鋸都要鋸斷同歐盟嘅關係。好的,來吧!歐盟依家笑到反艇。


好多人成日問,究竟點解一個國家,會選出一班狂人做總統呢?例如美帝有侵侵,英帝有波叔。咁之前都講過,係依家好多響過往幾十年嘅社會losers(唔算係乜都冇嘅窮人,而係唔知乜嘢原因,總之就失敗者),覺得依家響體制內嘅一班人,食晒所有筍嘢,佢地要真真正正嘅還政於民:即係搵條友,去拆晒成個台,最好打爛晒個體制,重新reset過。


呢個睇法,唔係美英問題,而係全球問題。因為咁樣,舊年台灣嘅Korean Fish就可以乘勢而起,一嘢就可以打瓜民進黨嘅選情,一人救全黨。但係,路遙知馬力,依家要Korean Fish一跳就上去做總統候選人,睇落去就真係頭痕。一來,佢上台之後,響高雄市都唔係有好大建樹啦,另一方面又成日花時間去其他地方搞選舉,搞到好多人都唔多見佢執政;二來,藍營係未真係一個好想Korean Fish贏呢?至少藍營裡面班精英,唔係個個支持Korean Fish。咁樣落去,唔怪得郭生想出選啦,因為既然群眾早前以為拆散體制嘅Korean Fish搞唔掂,咁不如畀群眾支持一個第三勢力,即係郭生,出來選總統呢?到時English Choi,Korean Fish再加埋郭sir,咁來緊總統選舉就好睇了。

Ad Block


無嘢嘅,當群眾醒返,發覺真係搵個攬炒領袖出嚟做總統又或者首相,其實生活都係如常,體制都冇變過,結果都係含淚要返舊體制,哈哈! 


倫敦大學亞非研究學院法律系博士

請接受以下私隱政策及免責聲明,以示你同意am730內之私隱政策及免責聲明。了解更多
接受