Ad Block Ad Block
新聞
2020-02-14 04:30:00
日報

拜拜拜登

分享:

美民主黨初選可以係意料之外又係意料之內。原本係民主黨精英中產階層支持嘅大佬拜登,真係燈燈燈凳,一鋪初選就敗陣,而且形勢不妙,似乎俾黨內改革旋風掃低。好多口痕友已經估,佢似乎無力挽救,部分仲估計佢好快會宣布散水,唔好臨尾香咁樣衰。
 

依家並唔係爭論邊個累到拜登輸初選之時,因為黨內精英階層依家想的是如何止蝕。所以有口痕友放風,不如搵彭博出手云云。呢啲吹口風的事,大家聽下就算。一來彭博係未願意臨危授命仲未知,二來依家個勢係對民主黨精英階層相當不利,因為大家都見到,選民的投票意向,係反體制,更加係反精英 ,特別係反對boomers壟斷的權貴政治。


從侵侵崛起可見,選民係要一個有行動力去打爛及拆散體制嘅癲佬,但係就唔使去到最盡。換言之,呢個人未至於要將美帝改變到成為一個共產政權,但就至少要打爛個體制,而非改革體制。侵侵之贏,而且連任機會咁高,就係因為佢真係劍及履及,將唔鍾意嘅共和黨精英一個一個咁樣打低,而且360度咁樣郁晒前朝的操作。咁樣連共和黨參議院嘅大佬及大姐依家都已經臣服於侵侵之時,民主黨又可以點樣回應呢?


美民主黨之基層選民就投票話俾黨內大佬聽,唔好再搞一些修修補補的假改革,而係要一個真正嘅翻天覆地嘅轉變。所以激進些少嘅黨員就支持桑德斯,而一些溫和些少嘅支持者就走去支持彼得哥,呢個名不見經傳嘅後生前市長。咁樣落去,真係唔係辦法。剛剛新罕布什爾嘅初選,最激嘅桑德斯贏咗,同埋後生嘅彼得哥就排第二。當然,通常民主黨初選嗰幾個州份,都會係最激嗰位領先,但去到最後仲係唔係佢呢?大家要等下。


台灣嘅疫情戰,查實係政治戰,一場更慘烈嘅兩岸政治角力。由於English Choi政府之強力做法,起了一個好勁嘅示範作用。因為佢地示範咗,點樣用強力嘅措施,去管制口罩以及檢疫,但係早幾日就因為係唔係俾台灣人,響北方大國嘅非台灣籍配偶或者子女撤去台灣,幾乎出了亂子。政策原本話基於人道理由係俾嘅,但唔夠一日就政策大轉彎,變咗唔得。後來發覺係因為有一班藍營立委向政府陳情,搞到政府放鬆咗有關政策,幾乎出事。


無嘅,選民響疫症嘅時候,自保心態會更加強烈。呢個時候,仲講兩岸係朋友,一家親等等,形同政治自殺。藍營選主席,依家就幾個參選人日日出來熱身。咁好明顯,藍營精英鍾意郝龍斌。早前斌叔參選時仲話,反對法理台獨,支持中華民國,仲話年輕人並非萬能,世代交替唔應該變成政治鬥爭云云。咁樣搞法,如果佢贏咗主席之位,將來大選怕且都會輸。 
倫敦大學亞非研究學院法律系博士

Ad Block
請接受以下私隱政策及免責聲明,以示你同意am730內之私隱政策及免責聲明。了解更多
接受