新聞博覽館主席陳祖澤博士(右2)、副主席陳淑薇(左2)、與講者鄭寶鴻(右1)及黃鳳嫺(左1)一起慶祝博覽館成立兩周年。
位於中環必列啫士街街市舊址的香港新聞博覽館，唔經唔覺開幕已經兩年，頭一年有5萬幾人次參觀，但受疫情影響，今年大部分時間要休館。不過，館方為慶祝開館兩周年，昨日舉辦一個網上講座，由博覽館顧問鄭寶鴻及消委會總幹事黃鳳嫺，一齊講下「從擺地攤到網購」呢個題目，與參加者穿梭時空，暢談百年以來港人生活面貌及購物習慣轉變。
鄭寶鴻身為香港歷史專家，席上分享昔日市集地攤擺賣情況，以至上環大笪地「平民夜總會」的繁華熱鬧，即係今時今日上環碼頭巴士總站一帶，擺地攤正是香港上一代的珍貴集體回憶。黃鳳嫺則提醒大家網購要小心的地方。
此外，新聞博覽館昨日邀請到必列啫士街街市前檔主潘關瑤英重臨舊地，為其預祝90歲大壽。潘婆婆感慨良多，話活化得比以前更好，冇諗過街市會變成新聞博覽館，盛載港人集體回憶。
昔日街市檔主潘婆婆重遊舊地，感觸良多。