近期港股勢頭更勝美股，有機會打開所謂decoupling的兵分兩路新局面，但另一邊廂則不斷有新力量為淡友作疊瓦式打氣，老土啲講句，揀股真係好重要啊！
站在小股東及小投資者利益的立場而言，證監會追捕冇良心董事及RO，確也無可厚非，以往做到上市公司董事實在何等威風，但今日則跟升降機從業員一樣高危，分秒得負上刑責。身邊有不少老、中、青董事好友，大都只嘆表面風光，午夜夢迴之苦只是啞子食黃連。
當一個上市公司董事不難，基本上沒有多大履歷背景所限，所有資料向監管機構如實上報便是，但一旦面對出了問題的決策，儘管有著會計師、公司秘書、律師、估值師及財務顧問等作前線保護屏障，只要簽下一紙之證，便必是首當其衝的承責者，其中更以執董責任最重，十數年前便有一中型眼鏡股出了事，董事長曾以唔識英文作辯護理由，當然是罪不可赦。至於獨立非執董或非執董，雖不直接負責常務，惟EGM、AGM及董事大會上都需列席，若有份通過問題議案，亦是難以獨善其身矣。
RO更難當，券商營運牽涉投資者直接利益，審核資格較董事更嚴，除了要緊盯資本流動比率外，還需對客戶背景了解通透，絕非只當上註冊人便可一了百了。
空軍群起出擊，中金又點出了66隻老千股，股壇長毛再乘勢附會，推多50隻喊住唔買得嘅股仔，再加上個別傳媒人肉搜尋幾十隻聲稱所謂暗黑細股，股場已是草木皆兵，如今證監會又非常罕有地預先大肆張揚嚴拿問題董事及RO，相信將有更多股仔成為失火池魚，小股民又有排震了，港股共計二千幾隻，減減埋埋，還有幾多可以放心下注？結論是否一如大時代金句：及早離場？！
不過，老高則仍堅持五雄六旺七瘋癲睇法，只是資金將更集中大中型國企紅籌和本地傳統穩健股、及純以資金推動而業務簡單的守法股仔而已，由於已有好多股票被認為唔買得，所以免疫股更成局砌對象，最終只會令升勢更為加速，揀啱正股，就成就到閣下終身大事了！