講到大學作育英才，就令Ray想起樹仁大學創校校監胡鴻烈博士。最近同教育界人士講開胡博士對大學的超凡貢獻，講講下先至知道，原來樹仁將踏入45周年，明日會喺校內舉辦校慶酒會之外，更首度頒發「終身成就獎」予胡博士。呢個獎項別具意義，校方仲特別邀請了政務司司長張建宗出席，由他來代表校董會頒授獎項予胡博士。
胡博士已經97歲，近年已甚少出席公開場合，不過聽講佢明日仍會親自到場接受獎項，校方話反映胡校監對樹仁大學的尊重與愛護。難得與胡博士見面，Ray估計到時應該有不少師生到賀，場面墟冚。
除此以外，酒會上亦為新落成研究院綜合大樓的開幕禮。呢座大樓同樣座落於寶馬山慧翠道樹仁大學建築群當中，毗鄰文康大樓，雙幢式設計，由高低兩座建築物和裙樓組成；高座14層、低座7層、慧翠道以下的裙樓5層，總樓面面積近38萬平方呎，為大學五千多名師生增加了教研和其他活動的空間，亦為大學提供持續發展的空間。
校方話，大樓高座7至14樓為學生宿舍，宿位500個，令大學宿位增加一倍。此外，商學院4個學系及5個研究中心已陸續遷入大樓的高座，內設教室之外，低座更有兩個大演講廳、多個導修/研討室，仲有大量供學生使用的空間，包括多個自修室、休憩室、電腦室、咖啡座、低座天台花園等。
