市民笑着說：「林生，我發覺你講嘢方式好獨特喎，好似嗰次質問嗰個選舉處嗰官咁，「『你究竟有無搵人睇實部電腦？！有定無？！』，以前你喺廉署審犯係唔係咁㗎？」先生模仿我的強硬語氣，維妙維肖。
六呎四：「哈哈！廉署唔用『審犯』呢個說法，免得被指逼供，通常叫做『警誡會面』，中性啲嘛。其實立法會質詢官員同廉署與疑犯嘅會面無得比，我在廉署一次過可問疑犯三個鐘，立法會通常只有四分鐘，仲要連問連答，所以要一針見血，嗰次嗰官不斷遊花園消耗時間，我火都滾，語氣重咗啲。」
市民：「唔重，唔見咗全港選民資料，鬧得佢少啦！廉署問三個鐘？有咁多嘢問咩？」
六呎四：「有時三個鐘都唔夠，休息完仲要問多次，其實無限制問幾多次，唔好疲勞轟炸就可以。由於大把時間，大可欲擒先縱，任由其大話西遊一段時間，然後抽絲剝繭，嘗試了解真相，其間好多文件證據要展示，讓疑犯回應，仲要澄清矛盾內容，核實重要細節，所以時間不會太短。」
市民：「咁689被立法會問定廉署問大鑊啲呢？」
六呎四：「公關而言，一定係立會問佢大鑊啲啦，傳媒影住直播全港，如果專責委員會問佢三個鐘，啲語言偽術頂唔住嘅，廉署相反，用閉門方式會面，公眾都唔知會面內容。但從法律角度，廉署警誡會面取得嘅口供會呈堂做證據，689點會答問題呢？否則答錯咗，好大鑊喎！」
市民：「如果你有機會問689，千祈唔好放過佢呀！」
六呎四：「一定盡全力，不過啲保皇黨會不斷轉移視線，掩護689，我到時肯定勞氣過對住選舉處嗰官。但前提係，689要肯嚟立法會，先有得問囉。」
市民：「咁689唔慌肯去立法會啦！」
大家苦笑無言。