有時不得不潑冷水：當一個資本家有錢到富可敵國兼不顧面子(或俗稱爛塊面)，當一個政府即使點樣憎厭資本家，仍然響最重要關頭企響旁邊闊佬懶理時，工人運動最終都會被拖到唔知去咗邊度。
先唔好講工人面對之困境，講下中產。作為中產，你去資本家之集團買樓，你會遇到好多估唔到又無可奈何嘅怪事。你買嗰個單位，地腳線、插蘇頭、電話頭等唔知點解會併埋一齊。個單位如果要轉去另一電話公司，居然要俾極高昂安裝費。曾幾何時，要幫襯另家公司裝聰明盒睇英超，居然又唔得。窗台成張床咁大，你又唔知有乜用。好啦！你花咗幾千個買咗個豪宅，露台玻璃居然會跌落街。你又驚呢啲事揚咗出去會影響單位價值，於是又啞忍吞落肚。閣下屋苑得呢個資本家之超市，想叫賓賓去最近街市，搭車來回都要一個鐘頭，於是你又吞咗落肚。你估班中產冇嘈過咩？中產響業委會、討論區、媒體都嘈過，你是但去google打幾個字都搵到極為尖刻的批評。不過，最終住響心曠神怡的中產，唯有努力儲錢搬走。搬唔到嘅中產，唯有響討論區發洩一下，忍忍忍忍忍。
問題係，即使係中產，忍咗呢個集團一肚氣，但係都冇企出來，扯條大banner，同呢個集團對決、反抗、上街，大家就知道，香港中產查實係一班好聽話、好忍得同埋唔願意企出來向財團說不之人士。口講說不，心裡懼怕。香港資本家，睇穿咗中產之弱點，咪盡情剝削囉。大財團都知道中產性格，只要企得硬，反對意見最終都會跪低。所以，香港大財團咁有力量，除咗政府要俾面，積極結合之外，亦都因為市民大抵好忍得，冇出來反抗。
今次碼頭工人有冇令香港市民覺醒呢？睇來睇去，除咗香港班左翼朋友義無反顧咁支持落去，同埋有同情心嘅朋友會靜靜雞捐錢之外，大部分都好冷漠。大財團見到冇十幾廿萬人企出來撐工人，仲唔企硬到底？反正，十幾廿億，蝕得起也。而且，財團如果因為工人示威就跪低，咁財團嗰班過往出生入死，互插上位之高層管理人員，咪即係過往三十年，管理失誤做錯嘢？如果有高層因為咁樣被問責炒魷，出現人事巨變，財團仲驚啦。所以，財團寧穩高層，犧牲工人，就真係好正常。
香港人會唔會因為今次工人運動而覺醒？我都幾悲觀，除非本地讀大學之人數增加，仲要確保增加更多左翼之課程，否則，呢類工人運動好易變成左翼朋友你like我，我like你的浪漫。
倫敦大學亞非研究學院法律系博士
ADVERTISEMENT
立即更新 /下載AM730手機APP 體驗升級功能
