加人工

公僕人工加幅，搞到工會好火爆，呢樣嘢好多人未必明白。公僕加人工之幅度，永遠係滯後，因為今年加薪之幅度，係以舊年私人機構加薪幅度，以及其他因素加埋一齊，然後一併考慮。所以，要加，都係滯後。

加人工，個個打工仔都有一個預期，即係人工有得加的話，至少唔好輸畀通脹。假如連通脹都追唔番，咁就唔係加人工，而係減咗人工，因為工人的購買力係低咗，無得講。所以，今次公僕加幅，特別又係高級公務員之加幅又係少咗，令唔少公僕好氣餒也。

「局長奶媽」對記者講，公務員士氣唔係只係講薪酬，聽完我笑到碌落地。既然係咁，不如所有局長都拿一半出來畀公益金？今時今日響政府工作，貪佢乜嘢呢？一係飯碗穩定，二係薪酬穩定，而唔係每年實質地減人工。依家飯碗係唔係穩定呢？問下用合同制底下的政府員工就知道朝不保夕係乜嘢。至於過去咁多年，好多所謂高級公務員（特別係薪級點剛好係高級，或者高級嗰條線高些少的朋友），其實人工無乜實質加到，對比起私人機構之同樣工作職位，兩者之距離正慢慢地拉遠咗。

呢個係現實，相信局長奶媽點會唔知。人手唔夠底下，仲有個領袖，鍾意夜晚叫局長上去佢屋企嗰度腦震盪。嗱！通常有啲局長，乜都唔識，會叫常秘救命。常秘忙到嘔，就叫下面交資料。下面收到「柯打」，隨時殺到夜晚，遇著嗰啲無聊嘢真係唔識，仲要去問署級官員。你話啦，咁樣係唔係影響士氣？打死都唔信。

如果咁樣做之後，嗰啲政策係好咗，思路通咗，新意多咗，市民掌聲多咗，咁樣官員條氣又順咗，下面啲員工覺得有工作滿足感，捱更抵夜都好抵。依家就唔係咁樣，如果唔加人工，當做領袖或局長工作「委屈費」，點樣頂落去？

其實，一連幾次都提過，依家吏治出現問題。依家上樑爛得好緊要，人工問題只是火山爆發之前嗰個地震，呢啲並唔可以當作薪酬政策來處理，亦唔可以當作係公僕士氣問題來處理，而係需要一次全面性的公僕改革政策來做，革除積弊，糾正績效，加快效率，下放權力等等。林sir上次話中層官員無咗承擔力，呢位當年搞公僕改革之舵手，點會睇唔到呢個結構問題？係佢唔知道，定係佢知道呢個係一嚿大炸彈(potentially)，唔敢企出來大聲要求政府做？

依家呢個政府團隊真係怪。應該講嘅嘢，無人敢公開或者私下講。應該做嘅嘢，個個爭住大聲講而冇人做。當真係要做嘅時候，個個爭住霸頭位但係就求其做。民望要反彈？難矣。（二之二）