兩年來，我和反圍標大聯盟的朋友一直宣傳反圍標的訊息，指出圍標集團的勾當和禍害，希望逼使政府打擊圍標。
傳媒朋友初初聽到我的「故仔」，往往禮貌地表示相信我所言，但問可否提供確實證據支持？無可否認，我無法提供任何一頁文件和證據，但我自知所講的都是事實。感謝各位傳媒朋友，相信口講無憑的林卓廷，令運動得以展開。
一些人半信半疑，尤其當聽到出賣鄰居、參與圍標勾當的業主，可收到維修總金額一成作為回佣，更覺得匪夷所思。這也難怪，因為現時屋苑維修動輒億元計，一成回佣代表是數以千萬元的賄款，覺得「就算貪都無可能咁誇張呀？點會分咁多俾佢呀?」質疑的都是老實人，他們不明白Criminal的想法，那幾千萬黑錢根本不是由圍標集團支付，而是從每一位小業主荷包「老屈番嚟」，正所謂「有錢齊齊搵」，只要有人搞得掂個「盤」，佢要收二千萬，No problem，只要將總數加多三千萬咪得囉。乜唔係加二千萬咩？真係食懵你，佢收多二千萬，我唔使相應收番多啲咩！
現時揭露的圍標案件，只是冰山一角，我估計每年維修市場近二百億元，圍標純利約一百億元，實在「好搵過賣K仔」，風險低，利潤超高，難怪吸引黑社會、專業敗類、甚至原本身家清白的人，串謀圍標，令小業主蒙受沉重損失。
我經常想，既然新界丁屋問題可拍成《竊聽3》，圍標黑幕必定可拍成《竊聽4》，票房應可創新高，因為元素更豐富，包括黑社會+斯文敗類+無能官員+苦情小業主，最重要是有個義務「資料搜集」，即係我，真係諗下都覺得好好睇。
Facebook：http://goo.gl/NprQPZ