香港記者協會日前舉辦《導火新聞線》「記協會員場」，Ray都有機會先睹為快。放心！以下內容無劇透，只會講放映之後嘅分享，編劇潘漫紅就講佢寫到喊。
電影要引人入勝，必定有矛盾及對立位，《導》的主線梗係講記者處理新聞時嘅掙扎，而比較貼近現今社會狀況嘅，就係網媒盛行下，點樣吸引低頭族，爭取點擊率。電影大綱唔多講啦，不如講編劇點解會用香港嘅司法制度作為題材。潘漫紅話，原本第一個故事大綱係關於金融黑幕嘅，點知覺得唔妥，如果要不斷畫蛇添足去完成整個故事，那根本可以丟掉。後來，佢向老闆蕭定一提出再諗兩日，期間佢睇書見到夾著的書籤，介紹一本日本小說，內容就係從當地其中一條法律發展成偵探故事，跟住就啟發咗佢嘅靈感，重新寫成依家喺大銀幕上播放嘅電影。
潘漫紅仲話，之前埋首3個月，真係寫到喊，因為好驚受到續集嘅詛咒，無法延續之前電視劇嘅美好。至於劇中演員王宗堯、周家怡與楊淇就話，佢哋喺3年前演《導》電視版，孭住記者個角色咁耐，先至演得入型入格。現場嘅記者行家對佢哋嘅演出梗係無意見啦，最有意見只係戲中嘅其他選角，例如配角張松枝太靚仔，與佢飾演現實中那位官員不符囉！
Ray~投身傳媒工作多年，由市場研究做起，一直與公關、廣告、新聞界結下不解緣，心境永遠青春。
