承接上期國金軒hidden menu，Edwin師傅仲有另一款拿手菜式─賀年菜「好市顯貴雞」。Edwin師傅將傳統菜式蜆芥富貴雞作微調，加入金蠔粒同火方粒等香口食材一齊炒，再用手撕雞嘅做法，保留金黃香脆嘅雞皮，再用生菜包埋一齊食。爽脆嘅生菜、香脆雞皮、嫩滑雞肉、厚實金蠔同火方，一啖咬下，口感豐富而多層次。最重要係咩啊？呢個菜式個名夠響！生財好市顯貴雞！個個都buy啦！呢個菜式餐牌上無㗎，大家想試，記得打去訂位時講明要預訂呢個菜式。不過，就算你打電話訂咗都要講運氣，都要等師傅double confirm你供應情況。假如俾你成功訂到又食到，就係真真正正「生財好市又顯貴」喇！
國金軒 尖沙咀The Mira Hong Kong 3樓 2315 5222
訂閱 《am730》 電子報
每周精選內容直送收件箱📧
掌握重要新聞資訊📈 財經投資🤖AI科技生活 🍽 美食玩樂 🛍 消費優惠 📰 城中熱話
提交代表本人同意接收am730所發出的推廣電郵，你可查閱本網站的私隱政策。