天星愛鐘樓(上)

日出日落晨曦晚霞，匆匆無數角色步履，隨浪濤起伏踏過跳板，上落身影中有卑微願望，也有採星宏圖。

「夜渡欄河再倚，北風我迎頭再遇……」每搭小輪渡港，腦海總會哼起這幾句歌詞。雖然唔係去福音戒毒，但係幾許經歷人生變遷，每當乘搭天星小輪，都「滿載清醒再次開始」。

旁晚霉糜碎雨，拾步尖沙咀鐘樓行人區，人潮擠擁熙來攘往，傳單街站走鬼小販，混雜人群遊客。由鐘樓海濱廣場至五支旗桿，猶如處身低壓區呼吸急促，空氣瀰漫各式嘈雜喧鬧，透過擴音器傳來大小聲響；鐘樓前地或旗桿廣場，三數少年彈著結他，歌者途人，各有精彩陶醉。

為生活需踏跳
乘坐小輪渡過維港，陪伴柔柔海風還有眺望九龍岸上鐘樓，有如守護著海港。晚上乘著亂髮海風，船艙昏暗影照燈黃，隆隆作響柴油機聲，情侶互相依偎細語，絕是最便宜浪漫嘅拍拖小確幸！

過往八九十年代，乘客絡繹不絕有禮從容，大量白領一族習慣入錢追閘，未降定就上落跳板，生活就係充實地快。天星可謂跟港人生活息息相關，美好但艱難慳儉嘅年代，亦可以因為五仙船費曾經激起小島千尺浪。激情激動叫港島夜色變得浮誇，港人努力散發典雅氣質。難怪於2009年被「國家地理旅遊雜誌」列為「人生50個必到旅遊景點」，並獲美國旅遊作家協會評為「全球十大最精彩渡輪遊」首選，香港人同維多利亞港一樣，唔係浪得虛名。

為方便要遷移
十八世紀英國銳意將這港口打造為自由港，吸引大量來自世界各地商人投資定居。當中隨葡萄牙商船到達香港及澳門發展嘅印度及波斯商人，可謂舉足輕重。當中波斯拜火教徒Dorabujee Naorojee Mithaiwala，以難民身份到達香港當廚師，後來於1888年創辦「九龍渡海小輪」公司，提供來往維港兩岸渡輪服務。當年交通並不發達，更莫說來往港九彼岸，開辦之時公司只靠五艘燒煤發動單層船隻營運，直至1898年公司被「九龍倉集團」收購，當年渡輪一程收費為剛好係引發六六暴動嘅「斗零」。

第一代碼頭建於1904至06年，於九龍倉碼頭南端，即現今海運大廈一帶，不幸同年被颱風破壞決定南移重建，由1911使用至五十年代，及後再重建使用至今為第三代。不知是否刻意與中環作出分別，昔日九龍天星碼頭雖然英文仍叫Star Ferry Pier，但中文卻簡稱尖沙咀碼頭，同樣另一對岸命名為灣仔碼頭。

為發展作保留
到2000年政府有意將碼頭對出巴士站，遷往尖東並擴大廣場，及後多年各方爭取之下，甚至聯合國教科文組織論壇作討論，再到政府改變計劃打算碼頭上蓋加建觀景台及食肆，惟兩年後發現碼頭地基難以承受擴建工程，如此碼頭現況和巴士站才得以保留。保留嘅仲有已經係大輪嘅名字「小輪」，以及收錄於CBS新力唱片公司出品嘅《香港城市民歌》及《6 Pair半+城市民歌》專輯中之《昨夜的渡輪上》，同為一份平實嘅香港味道。