天星愛鐘樓(下)

「永遠向前，永不停步，尋求理想，始終達到。陪伴著你站一線，爭取一分一秒，時間第一，my friend！」小時每當想起鐵路，自然會聯想到準時，不過隨著時間推移，現在只有剪頭、沉降和超支，技術和誠信彷彿時光倒流一百年……

響唔係人人有手機嘅年代，時間掌握甚為重要。遲到唔等人，盡見於火車班次時間表，不論總站開出、沿途到站，直到終點，火車都係保持on time，整隊鐵路人員嘅車速控制，仲有各人個人操守，唔係一人話OK就OK，剪鋼筋就剪鋼筋。

為配套作接駁
講到接駁，1888年創辦嘅「九龍渡海小輪」，就係等到有火車和巴士作配套才為普及。1904年，九廣鐵路走線落實，並以尖沙咀為終點站，為此同年九龍角天星碼頭決定往南遷移至現今海運大廈地段作配合，兩年後落成，不幸同年又被颱風破壞，才再南移至現址全面重建。

而英段鐵路於1910年才能通車，碼頭則翌年恢復服務，而「九龍車站」再於1914年才正式動工，亦由於第一次世界大戰，影響從英國運港物料，叫車站工程一度暫停，直至年底列車才開始使用車站月台。繼而翌年鐘樓完成，整個車站則於1916年才全面起好，而巴士站則於二十年代才為啟用。所以話尖沙咀碼頭+火車站+巴士總站，正為昔日香港、九龍、新界嘅公共交通交滙處。

為歷史作重置
及至1972年海底隧道通車，港府決定在隧道旁興建新站，以取代尖沙咀「九龍車站」作全新交通交滙，新站於1975年啟用，而舊站則於1978年拆卸，有幸鐘樓得以保留。其實鐘樓為火車站設計一部分，皆以紅磚及花崗岩建成，而鐘樓樓高44米另設有7米長嘅避雷針，兩者皆為出自英籍馬來亞政府建築師A.B. Hubback設計。

初期鐘樓大鐘鐘面只得一面，乃於皇后大道中及畢打街交界嘅大鐘樓拆來至此。及至1920年，四鐘面才開始安裝並翌年運作。除了日治時期曾經停止外，大鐘一直運行至今，而其響鬧報時裝置五十年代初曾被移往沙田火車站大堂，之後收藏倉庫。及至2010年慶祝「九廣鐵路九龍至羅湖段通車100周年」，銅鐘才返回鐘樓並重置於地下。

為不義作轉捩
隨住紅磡站嘅擴建，天星小輪雖然面對近距離競爭，但每日仍吸引超過7萬人次乘客搭乘。縱然海路受填海工程影響波濤洶湧，又因港口收窄維港之間航距縮短，天星及香港人的續航力難得看似飽歷風霜，不過相信再多百年也能迎難而上。加上鐘樓屹立不倒，東方之珠今天燦爛或許更勝從前典雅。而於1990年鐘樓更被香港古物諮詢委員會評定為香港法定古蹟，受到《古物及古蹟條例》嘅保護。

正當新一代嘅紅磡站與其管理層一樣結構性問題多多，加上尖沙咀碼頭嘅嘈爆的大媽表演，又是否達至香港可容忍的臨界點，有待得以轉捩？！「永遠向前，永不停步，尋求創新，不依俗套……」準時和誠信，要求永遠最前。