雖然最近個個因為非洲豬瘟疫情而聞「豬」色變，但豬年將至，唔多唔少都會有「豬」嘅菜色應應節。城市花園酒店中菜廳「粵」，就用咗嚟自日本同埋歐美國家嘅豬肉，製作一系列賀年菜式。其中最驚喜嘅富貴金錢豬，賴師傅就用咗西班牙黑毛豬，加入煎香過嘅烏魚子、薑片同冰肉一齊燒，效果驚喜。唔單止冇咗平日金錢豬嗰份肥膩，上碟嗰陣底層仲加咗塊薑汁啫喱，平衡菜式嘅油膩感，食完都唔會滯住滯住。另一款賣相精緻嘅錦繡夜明珠，就用白蘿蔔絲包住匈牙利鬈毛豬同蝦米，味道相對清淡，加上外型討好又有意頭。賀年菜不外乎食個字開個靚年，食返啲優質豬肉自然安心啲啦！
賀年菜式供應日期：2月5日至2月19日
城市花園酒店中菜廳「粵」│2887 2888
訂閱 《am730》 電子報
每周精選內容直送收件箱📧
掌握重要新聞資訊📈 財經投資🤖AI科技生活 🍽 美食玩樂 🛍 消費優惠 📰 城中熱話
提交代表本人同意接收am730所發出的推廣電郵，你可查閱本網站的私隱政策。