am730辦公室昨日有特別訪客，就係美國兩大經典漫畫人物Popeye及Betty Boop，令同事都非常興奮，爭相拍照。原來呢兩位icon將於今個聖誕首次聯乘現身MCP新都城中心，幫手為商場宣傳，帶旺人流，條橋係Popeye及Betty Boop兩位繼1933年首次相遇後，再度重遇共度浪漫郵輪之旅。
今次亦特別邀得星級營養師謝詠瑩(Gloria)設計兩款配合主題的健康特飲，即Popeye增肌特飲及Betty Boop美肌特飲，啱晒潮流，男要增肌，女要美肌，以最佳狀態迎接開心聖誕。Ray試咗增肌特飲，發現含有菠菜及低脂希臘乳酪等成份，運動後飲用有助修補及增加肌肉，味道不錯，而美肌特飲就俾女士們捷足先登，不過其中的奇異籽、士多啤梨及無糖杏仁奶等成份，應該有助抵抗近日的秋冬乾燥天氣。
商場會於今年11月13日至2018年1月2日期間特別打造「Popeye x Betty Boop聖誕郵輪派對」，大家可踏上18米長巨型郵輪，與全新互換造型登場之水手服Betty Boop及浪漫甜心Popeye展開奇妙旅程。到時商場活動多多，係打卡好地方。