今個星期土下座覺得有單遊戲新聞好值得一寫，就係中國大陸遊戲營運商順榮三七，以收購價約6,350萬美元收購咗SNK Playmore八成股權，等於買起咗呢間叱吒一時嘅日本大廠。講SNK，認真長篇，不如簡單用遊戲入文。相信80後機迷都唔會對格鬥遊戲《拳皇》(KOF)陌生，KOF係繼《街霸》後，代表整個街機文化嘅代表作，另外《侍魂》、《餓狼傳說》、《龍虎之拳》、《Metal Slug》(不如何故中文俗稱「越南大戰」)、《戰國傳承》等等，每一隻都極受歡迎，剩係數IP(Intellectual Property，知識產權)已經感受到當年SNK強勢，甚至可與同樣以格鬥、動作遊戲著名嘅Capcom一較高低。可惜，SNK不敵時代轉變，或者話搞錯晒市場改變嘅時機，喺2000年左右，用大量投資研發3D格鬥遊戲，最終一年內蝕咗近400億日圓，真正一鋪清袋，不過，SNK嘅川崎社長，卻成功憑高超財技，將SNK賣來賣去又反收購成SNK Playmore，當中過程之曲折足夠寫篇專題，原諒無法慢慢解釋。可惜SNK嘅失敗早已係命中注定，如今大家可以等睇一間名不經傳嘅中國game廠，點樣慢慢消費呢間昔日皇者嘅僅餘價值吧。