每次去旅行想慳慳哋寄居朋友屋企，為免兩梳蕉咁上去，點都會買啲手信嘅。提起香港有咩出名，魚蛋燒賣碗仔翅又帶唔到上機(曾經試過帶Ｘ海叮叮碗仔翅去日本送俾朋友，嗯，佢唔太欣賞囉)，咁就唯有由餅食呢啲易hand carry、又擺得嘅手信入手。
友人C話次次都會買長腿天后陳敏之嘅祝奇餅(Blesscuit Bakery)做手信，派俾外國朋友「仔」。咁啱公司附近有一間，就即刻買盒試下！買咗盒細嘅，雖然得6款口味，但都要成$220(28塊)，比起其他手信店貴成截。但試真啲，又真係貴得有道理！由於曲奇冇用化學黏合劑，所以非常鬆化，咁當然，一定會食到周圍都係……香酥嘅牛油味慢慢滲出，曲奇口味亦多而創新。個人至鍾意黑松露、飄雪紅桑子同熱情果芒果味，聽講新年限定嘅藍龍蝦曲奇都好正，仲可以灑個法國藍龍蝦粉上去，好似好多嘢玩咁喎！