上回講到做crew的時間過得相對比其他工快，有時心理上的變化也可以好快。如果唔開心可以隨時去別處散心，變相調節心情，之前我覺得係一件好事。但呢幾個月返得工多，幾乎無幾日在港，回港感覺開始「麻木」，但因為一班夜機，大巴大巴掌咁摑醒咗我。
話說有班凌晨機去泰國一個來回，返到屋企都差唔多天光，我喪屍咁拖住個喼行經樓下天橋，本身無為意，行近就嚇一跳。本來已經被撕毀同洗淨的牆身再次被「文宣」黐得密密麻麻，地面、梯級、欄杆……可能每日見唔同連儂牆文宣創意無限，會覺得我太浮誇，但就係因為我住呢度，睇住個牆損毀往往快過建設，三日唔埋兩日就有人企度又吵又鬧又斬人，仍然可以貼到咁靚，真係唔容易，而我日頭返工經過的時候還是零……梯間見到3個大概到我膊頭高度的細路，拎住個裝膠水的桶，黐緊剩低的紙。我忍唔住行埋去，一時之間又唔知可以講咩好。三更半夜，3個細路，唔好話非常時期，就算平時我地成年人都唔會夠膽咁樣喺街，更何況今時今日的香港，撐警護旗就打人傷人無後果，加上前幾日發生完衝突，點解佢地仲唔驚？「驚都無辦法，總要有人做，唔做好快唔記得……」
香港人善忘，同呢區的情況很相似，拆毀往往很迅速。起初街坊都可以寫張貼紙，到現在只可在呢個時段出來貼通知。牆身經過沖洗，好似咩都無發生過，生活照舊。但呢班細路堅持到今日，仍沒有退縮。同佢地分開後，我覺得個喼越行越重 ……
開始有光，太陽就快出來了，希望所有細路都可以借住光線，平安歸家。
肥、毒、宅的空中服務員。