先嗰排，無聊睇電視見到主持人去葡萄牙食葡撻，令邦主今次衝出亞洲，同大家分享正宗葡撻體驗。呢間百年老店啲葡撻真係新鮮熱辣，香脆美味，而邦主仲學識咗食葡撻要加肉桂粉先好味，如果想再正宗啲，大家仲可以再加少少糖粉，不過咁食法真係要小心血糖超標！其實去呢間舖都好方便，鄰近里斯本貝倫塔同航海家紀念碑，過兩條馬路就到。
不過，大家又唔好以為間間舖頭啲葡撻都好食。邦主就等過中伏，喺黑馬廣場見到間麵包舖放滿葡撻，一心諗住冇死，點知又凍又硬又冇肉桂粉俾我加。真係樓下間炸雞連鎖店啲葡撻都好食過佢，可能呢啲先至係地道口味。不過，唔中下伏又點叫去旅行！
講開葡萄牙，如果有宗教信仰嘅朋友，就一定想去相傳曾經有聖母瑪利亞顯靈嘅花地瑪朝聖，宏偉嘅廣場、莊嚴嘅教堂同來自唔同國家嘅信眾一同向聖母誠心祈禱。而佢哋唔會好似中國燒香，只會燒白色蠟燭。邦主當然有買番兩支蠟燭參與吓啦！