由中環美利大廈改建而成嘅酒店The Murray Hong Kong，雖然預計年底先落成，但酒店喺上星期已經宣布，粵菜食府國福樓將會進駐，成為酒店唯一一間中菜廳。
國福樓喺2010年開業，係福臨門旗下餐廳。裡面嘅大廚大部分出身自福臨門，有豐富經驗。當日有幸同執行董事Duncan同枱食飯，聽咗好多粵菜背後嘅故事，亦分享好多關於當年佢爺爺徐福全先生創立福記同福臨門嘅故事。呢啲故事好少喺其他報道或電視上面聽到，背後嘅歷史、香港情懷、對食物的執著同堅持，真心袋咗好多嘢落袋，呢餐飯真係賺晒！
Duncan坦言市面上唔少酒店同餐廳中菜廚師都係出身自福臨門，廚房嘅同事雖然換得快，但亦因而令大家升遷速度快咗，唔使等十幾年先升到高層，對佢哋嚟講自然更有動力工作。所以佢哋最資深嘅大廚都只係五十幾歲，但個個都根底紥實。唔怪得大劉咁捧場，即刻明晒！