立秋「收納」養生 甬府慢火「焅」出寧波靈魂
近來雖然熱焫焫，但原來一轉眼已經過咗立秋。講到順應節氣，一向低調兼對食材講究到極致嘅米芝蓮一星、黑珍珠一鑽精緻寧波菜香港甬府，最近就推出咗全新嘅「立秋宴」。總經理俞瓊小姐同行政總廚劉震先生話，立秋講求一個「收」字。夏天體內陽氣發散得太多，入秋就要順應天時去收斂氣機、固本潤燥。佢哋兩位對食材味道有幾執著，行內人都知，今次菜單好有心思，特意分開三個部分，由輕入豐，每一道菜都係心機之作。
甬府立秋宴│第一部分「秋涼初至」先用前菜輕柔開胃
脆口嘅蝦皮醋漬紫白菜同鹹鮮嘅雪汁膏魷魚筒先喚醒味覺，接著有渾厚糟香嘅魚子醬糟響螺，最精彩嘅壓軸前菜莫過於寧波焅菜燜刺參。講到呢度就要講下冷知識：寧波菜講究火候，而「焅」(讀音：焗)正正係甬幫菜嘅靈魂絕技！寧波人最鍾意冬至前後用菜籽油慢慢焅大頭菜，好多人以為焅菜同紅燒差唔多，其實焅所需嘅時間長得多，係將食材加入大量醬油吸調味後用小火長時間燜煮，將醬汁煨到完全收乾。今次劉師傅將呢種經典家常焅技升級，高質刺參加上微甜濃香焅菜同吃，刺參軟糯彈牙、焅菜吸飽精華，一清一濃由輕入豐。
甬府立秋宴│第二部分「秋實豐成」山海相合
一碗翠梨川貝蝴蝶蚌冷湯先幫大家清熱潤燥，跟住落嚟一連串主菜進入戲肉：腐皮小芒森甜酒溏心蝦蛄卷外香內嫩，甜酒果香帶出瀨尿蝦嘅鮮甜；秋實茄汁雞油菌燴龍蝦用番茄嘅酸甜配埋板栗、蓮子，將龍蝦同雞油菌嘅鮮味提到最高。當中最驚艷嘅，係麻辣牛油果豆腐燉煎魚臉！極度滑嫩嘅魚臉肉吸飽麻辣湯汁，最神奇嘅係加入咗牛油果，綿密嘅口感完美緩和咗辛辣，好平衡，變成普羅大眾都鍾意嘅「輕麻辣」奶油香。想「貼秋膘」充實下，就有慢燜嘅黑虎掌燜黃牛肉，加上黑虎掌菌油鹽土豆，沉穩又滋味。最後用一道海蜒江瑤柱鹵冬瓜作結，江瑤柱嘅鹹鮮滲入去燉到近乎入口即化嘅冬瓜，小黃魚乾負責提供鮮味，平衡主菜嘅厚重感。
甬府立秋宴│第三部分「秋韻悠長」
嚟到尾聲，點少得甬府手工水餃？雖然並唔係我心心念念嘅薺菜豬肉水餃(冬天限定)，而係香脆嘅鮸魚海蝦煎餃，卻一樣將我迷倒。壓軸甜品燕窩蜜桃椰油冰淇淋甜而不膩，為呢一餐立秋宴畫上一個清潤悠長嘅完美句號。整個「立秋宴」十二道菜式味道精準，冇過度包裝，純粹用火候同食材說話，正正係我喜歡去甬府的原因。(供應期：8月10日至9月9日，每位$2,888)
甬府
灣仔駱克道20-24號金星大廈地下2號舖及1樓
ADVERTISEMENT
【👇成為推薦王！贏海洋公園雙人門票及$200禮券👇】
