1 講到erotic，相比David Mapplethrope嘅作品，CK系列廣告只係小菜一碟。
上個禮拜Calvin Klein推出16春夏新廣告，其實唔使睇都知一定有裸露、一定有年輕貌美男女模特兒，擺出惹人遐想姿勢，基本上自從八十年代波姬小絲那個Calvin Klein Jeans廣告以來，品牌就係靠sex sells呢招，近幾年無論出動到Justin Bieber定Kendall Jenner呢班年輕偶像名模都好，其實迴響都經已大不如前，今次舊橋再炒花生成功，好大程度上係觸動到性侵呢條底線。
嗰啲「道德重整會」會長之流嘅睇法，我覺得不值得討論，好似Kendall Jenner拎住個切開一半嘅西柚，令人有陰道嘅聯想，以前David Mapplethrope嘅蘭花系列，都經已開創靜物情色攝影嘅先河，今勻充其量是模仿甚或致敬；去年亦有一個美國內衣品牌Thinx以相同類比來宣傳，亦掀起過一陣風波。
反客為主挑戰父權 今勻最大爭議的一張相，係model腿張開，由攝影師低角度高炒影上去嘅裙底照，給一個反對性侵的組織National Center on Sexual Exploitation (NCOSE)出聲明譴責，認為品牌將性侵美化甚至正常化，要求Calvin Klein道歉及將廣告下架。 我同意呢張相係成輯廣告中最具侵略性，第一眼嘅感覺係幾令人唔舒服，但細睇模特兒嘅目光直望鏡頭，並唔係一般遭偷拍嘅苦主般渾然不覺，又或者好似AV女優嗰種誘惑眼神，配合埋廣告標語「I flash in #mycalvins」，完全係嗰種「我大你敢唔敢睇」嘅態度；成輯廣告都係挑戰緊嗰種物化女性嘅主流男性凝視，係sex appeal，但唔係appeal to man，而是appeal to woman。
全由女性話晒事 順帶一提，這輯廣告嘅攝影師Harley Weir係女性，好多作品都以女性作重心，好似佢為Proenza Schouler初春系列拍攝嘅短片，就開宗明義探討各種女性關係，如母女、姊妹、女女(朋友、戀人)等，既有情，亦有性，動不動因為涉及性嘅題材，就搬物化女性嘅罪名來扣人帽子，因住變道德塔利班而不自覺。
Email: [email protected]
Fashion and the City 雜誌小薯仔編輯一名，誤打誤撞亂入時裝beat多年，愛時裝作為創作的一面，憎時裝的snob及離地。
2 Calvin Klein 16春夏廣告成功炒起過噸花生，但返回衣服本身，卻乏善足陳，我覺得對個品牌來講，才是最sad嘅地方。
3 Harley Weir為Proenza Schouler初春系列拍攝嘅短片。
4 內衣品牌Thinx去年都用過西柚來引發聯想，一點都不色情，一樣掀起軒然大波，只能夠講，保守勢力去到邊到都有。
5 Harley Weir呢輯喺《i-D》發表嘅作品「Kiss Me in Delicious Body Image」，影像更懾人。