Ad Block Ad Block
新聞
2021-01-14 04:30:00
日報

《三國志戰略版》課金地獄 不及《最後的克勞迪亞》

分享:

今星期土下座啲打機group俾兩隻game洗版,首先講下香港廣告鋪天蓋地嘅《三國志戰略版》,宣傳以唔靠課金與光榮授權最忠於原版為賣點,的確無論玩法及設計都非常出色,加上唔係首次用《三國志》做手遊,出錯機會自然更低。不過,雖然資源士兵唔使用錢買,但淨係「抽卡」依然係課金地獄,事關武將相性非常重要,抽中一隻就要焗住抽齊一隊,而且佔地嘅玩法都要迫住大家經常上線,甚至需要有組織咁去玩。開服唔夠幾日,已經見到排名最高嘅都係著名課金名人,講白啲就係要用真錢打天下,相信中意玩單機嘅朋友唔會有太大樂趣,整體上反而不及另一隻新手遊《最後的克勞迪亞》。開發呢隻game嘅社長早貸久敏喺手遊有唔少經驗,包括《Brave Frontier》、《Final Fantasy Brave Exvius》、《Blade X Lord》等,鍾意用復古pixel風格表達。呢隻《最後的克勞迪亞》嘅美術更可稱得上頂級,除咗角色插圖唔夠搶眼外,2D角色夾3D場景感覺比起Switch名作《Octopath Traveler》毫不遜色,加上日版已營運一年,因此內容已相當豐富有趣,中意JRPG嘅朋友更值得一玩。不過缺點係設計上都係需要花大量時間「農」game,重複打素材、打裝備呢啲設計仍然冇得避!

請接受以下私隱政策及免責聲明,以示你同意am730內之私隱政策及免責聲明。了解更多
接受