又到咗遊戲界五窮六絕嘅時間，除咗上月嘅《Days Gone》，睇睇遊戲發售表，比較適合香港玩家口味嘅，似乎要等到6月嘅《人中之龍5》同埋《侍魂‧曉》，前者係重製版本暫時唔多講，後者上次土下座都講咗幾句又暫時唔想重複，唯有睇下手機平台有咩得意嘢。話說手機平台因為裝置限制嘅關係，其實非常流行「Rougelike」遊戲，簡單講即係遊戲可以短時期玩完一局，可以不斷重複，每次重複都會有亂數事件，所有資料可以儲存到新遊戲嘅RPG，最近有隻叫《紙境英雄》嘅Rougelike就非常好玩，巧妙結合咗Rougelike、卡牌遊戲同戰棋3個元素，玩家要扮演3個主角其中之一，幫助女王解決龍王嘅陰謀，但當你以為自己係英雄嘅時候，遊戲又設計到有啲亂數令你偶然可以解開真正劇情，揭開大反派女王嘅真面目，所以每次玩都會覺得成隻遊戲完全唔同，除咗講運氣，亦好講戰略運用。其實呢隻本身係PC遊戲，Steam平台評分都接近滿分，手機版係免費下載，高度推薦呀！