又又又一年啦！好高興可以繼續同大家分享下遊戲業界二三事。作為2021年第一期，土下座諗咗一陣都係覺得要寫LOL嘅手遊版本《英雄聯盟：激鬥峽谷(簡稱LOLM)》，唔係因為香港區已經開放，而係都幾肯定今年呢個話題都會keep住大熱。暫時LOLM未開港版，但同我哋最近嘅台版，土下座就已經玩咗一排，由於只要用VPN改一改地區，登入一次就以後唔使再用，估計server係國際共通，所以會見到好多唔同國家嘅人出現喺台版，唔止得台灣朋友。咁到底LOLM又係咪真係預期中，一推出就可以砌低《傳說對決》(或《王者榮耀》)嘅江湖地位？我認為暫時答案係「否」，事關遊戲明顯仲喺探索階段，平衡性未有PC版咁成熟，而最重要係，玩開《傳說》嘅相信都好難習慣LOLM嘅合作性、節奏同整體玩法。亦因為佢講究細節嘅操作，較難上手，直情未玩要先上網惡補資訊嘅程度，唔似《傳說》咁連角色應該打咩戰線都會顯示，相信玩家都唔會好爆炸性咁成長。不過LOLM現時係測試階段，以Riot Games嘅能力，相信日後就算搶唔到手機MOBA龍頭，都肯定係最少大熱4至5年嘅手遊。