自從高調咁加入iOS手機遊戲平台後，任天堂已經唔係當年一口咬定「點都唔會出手機game」嘅公司，事實上，老任一次又一次咁將自家IP賣仔咁賣，原因都係一個錢字。由《Super Mario Run》、《火焰之紋章》到《動物之森》，收益之大，早就成為老任唔可以欠缺嘅業務，淨係計《火焰之紋章》上季都有三億幾港元收入。唔講萬眾期待嘅手機版「孖車」，今年首先登場嘅就係剛剛上架嘅《Dr.Mario World》，又係老牌IP再度復活，雖然同樣係方塊類遊戲，但玩法要照顧手機操作都有大改，並加入即時對戰功能，亦係遊戲最注目嘅玩法之一。土下座開咗game，玩落問題都不大，但仲未好體會到即時對戰嘅樂趣，可能因為遊戲太新，未有咩高端玩法，不過，整體四平八穩好有老任遊戲風格，免費下載點都值得玩下啦。