今年全球疫情愈來愈激，同時唔少名人明星離逝，經常有人問「2020年到底幾時完？」講真連遊戲業界其實都唔係幾理想，就以PS5同XSX/S為例，本來新主機登場係好事，但明顯因為缺貨令兩間公司都爆出公關問題，「PS5派機俾明星就有、賣機俾玩家就冇」更加係全城鬧爆。就算有幸買到機，兩間公司都冇咩勁game配合，完全係有機冇game玩嘅狀況。至於遊戲呢？大作睇落唔少，前半年講真都好正常，如1月開始有《人中之龍7》、《仁王2》、《女神異聞錄5亂戰：魅影攻手》、《FF7 REMAKE》等，直到6月《The Last of Us Part II》全球瘋狂圍插開始慢慢失常，《對馬戰鬼》、《Marvel’s Spider-Man:Miles Morales》、《Marvel’s Avengers》、《Watch Dogs:Legion》等，淨係講game名，腦海中已經充滿爭議聲音，全部大作都有明顯弊病，直到年尾本屬最強嘅《Cyberpunk 2077》，都因為對舊世代機支援太差和太多bugs兩大主因，引發玩家兩極嘅喜惡反應，一時三刻未能靠更新可以解決，可以話令人意想不到(土下座想補充，遊戲真係好玩，但bugs亦都係真多)。唔知明年咩環境，但一年容易又陪咗大家一年，喺度先祝大家聖誕快樂，下期再見。