久違一隻完全由PS5獨佔嘅遊戲《死亡回歸(Returnal)》，最近唔少媒體都一齊吹捧讚好，相信官方落咗唔少心機造勢。呢款遊戲主打TPF+Roguelike玩法，玩家每次死亡都係新遊戲開始，同時又會開拓新嘅劇情同內容。土下座自問都係Roguelike發燒友，先撇開遊戲整體3A級嘅製作，同埋高度配合PS5手掣嘅超勁觸感效果，純粹以遊戲性計，坦白講《死亡回歸》表現只屬一般般。
主打嘅Roguelike流程本來係最大趣味，可惜遊戲嘅處理方式完全冇味道，同類遊戲不斷重玩都唔會悶，除咗因為可以通過重玩開啟更多內容之外，每次玩法都可以唔同。但《死亡回歸》完全冇呢種思維，武器強弱明顯到離譜，玩家根本毋須考慮武器組合同效果、版圖設計及變化亦太少、精英房間獎勵回報率又唔高；天賦、角色增益等技能亦只能隨機獲得，種種問題都變相令玩家無法預先規劃每次遊戲嘅玩法，當然亦唔會有不斷重玩嘅樂趣。而偏偏遊戲係強行要restart先可以發展，令到重玩感覺只係用嚟拖時間同劇情，兼掩飾遊戲內容根本完全不足呢個問題。總之遊戲既唔似3A作，又唔似TPS，更加同Roguelike類型偏離甚遠，定位非常尷尬，只適合餓game、有閒錢或者想試試PS5手掣有幾勁嘅朋友，咁呢方面肯定唔失望！