可能部分朋友都知，其實LINE Games一直都有推出唔少好玩嘅遊戲作品，例如當年大熱嘅《迪士尼Tsum Tsum》、日本人氣嘅《JUMPUTI HEROES英雄氣泡》等。而最近就有隻叫《Smash Legends》嘅遊戲，全世界呼聲都好高，皆因佢係一隻以「任天堂大亂鬥」式玩法嘅作品，以3v3、PUBG大逃殺作為主要模式，每局大約係3至5分鐘，遊戲已經開始咗全球發布。土下座當然要實試，首先發現嘅係遊戲流程同介面，竟然同Supercell《荒野亂鬥(Brawl Stars)》有99%相似，直情可以話係抄；玩法就向「大亂鬥」致敬，角色暫時得9個相當不足，不過最大問題係平衡度同操作都相當差，部分角色無論玩咩模式都完全欠缺優勢。加上由於角色太少，令到3v3嘅遊戲體驗好快令人沉悶，雙方對戰嘅組合變化極低。假如同隊3個角色都係遠攻型，甚至可以打到對方無法反擊。如果呢啲問題日後可以好好改善，或者短期內盡快加推新角色，都值得大家即時入坑，否則都係睇下點發展先決定要否投資時間啦！