自從iOS 13更新後，Apple用戶已經可經用任何PS4或Xbox手掣配對到iPhone、iPad及Apple TV等裝置。土下座其實唔係第一年講呢樣嘢，本來MFi嘅手掣一早都有，但Apple直接認到PS4或Xbox手掣又係完全唔同層次，以最近App Store上架嘅《Dead Cells》為例，相信gamer一定聽過呢隻全球好評嘅神作，而App Store定價係平到只需58港元，係比任何一個平台包括Switch版更平，但你買完後，只要係iOS平台都可以下載，而且save仲要係用Game Center，所以都係共通的，進度完全同步，出街又可以用手機玩，返屋企又可以開Apple TV繼續。而《Dead Cells》支援PS4或Xbox手掣，就等於直接俾返你玩PC或家用機嘅感覺，更重要嘅係用Apple TV玩(較新的4K版本就可以)完全冇lag機問題。好多遊戲公司或科技公司，早幾年已經一直「吹」緊呢樣嘢，但根本就冇一間已經ready，反而係一早已經ready好嘅Apple後來居上，將概念轉變成可行嘅現實，土下座可以預言《Dead Cells》只係一個例子，未來肯定會更多移植作出現，就算機能上冇可能追到家用機，但唔好忘記因為有Switch及Steam嘅存在，市場上本來就好多賣遊戲性而非賣畫面嘅好遊戲。版位有限講到呢度，日後有機會同大家講講Apple Arcade。