話說《Bravely Default II》中文版翻譯引起中港台三地玩家嘅怒火，起因係玩家發現部分角色竟然講文言文，於是翻查日文版內容，對比之下，發現唔止角色對白會出現「汝等口尚乳臭、如是廝矣、娘娘、少俠」等，就連部分技能翻譯都變得武俠化，例如吟遊詩人嘅「不朽要塞的頑丈之詩」，中譯竟變成劉邦嘅「大風歌」，可以話非常黐線。之所以會出現呢個問題，要由遊戲中文化講起，其實絕大部分嘅中文化都只不過係流水式生產，外判俾翻譯公司負責，往往翻譯收到嘅都只係文本，冇畫面睇之餘，當然亦冇可能完全玩過隻game。另外文本亦唔一定係順住落，加上翻譯人員都係小組上陣，令到本身已經好零碎嘅文本變得更加零碎，偶爾會出現譯文風格前後唔統一嘅情況。須知道中文博大精深，英文嘅「huh？」，中文可以係「嗯？」又可以係「哦？」，意思同語氣都可以有好大分別。今次事件，似乎係翻譯公司連遊戲風格都未知嘅情況下夾硬上陣，導致本來穩陣直譯都未必會出現嘅笑話，為求中譯更加「貼地」反而做多咗，畢竟「吾輩」譯做「本座」都勉強可以接受，但去到吟遊詩人都識「樂府君子行」就似乎係玩過龍，希望日後有patch可以解決啦。