今個星期可以話資訊爆炸，即刻分享一下。首先繼Xbox Series X/S(簡稱Xbox X/S)後，PlayStation 5亦已正式宣布香港定價發售日。由於Xbox Series S唔純粹係冇光碟版，同PS5嘅數位版定位有啲唔同，所以以下都係以「貴機」作比較。先講PS5，有光碟型號美金定價雖然同Xbox一樣，但港版比機能更強嘅Xbox X貴一百蚊。不過由於PS喺香港市場佔有率一直大勝，因此PS5預購當日都變成社會現象，全港出現奇異排隊人龍，話題性方面可謂先贏Xbox……BUT！Xbox嘅預購其實都係10分鐘內秒殺，大家想搶訂都冇貨，雖然冇大眾話題性，但都證明Gamer對Xbox新機唔係完全冇反應，而且就喺Xbox預購當日，微軟亦正式宣布以天價75億美金，全面收購傳奇開發商Bethesda！即係表示日後嘅《Fallout》、《上古卷軸》等遊戲極大機會唔會喺PS5平台出現，呢一記超重擊！雖然PS5護航作仍有《Final Fantasy XVI》等名作，但都唔算係完全獨佔(FF XVI獨佔一年)，加上Xbox仲有Series S呢部2千頭就買得起嘅奇兵，基本上首戰可謂各有輸贏，下次交鋒可能就喺11月，期待！